«Հաց բերողի» հարցով մի խանգարեք Շուշան Պետրոսյանին
ՀՀ ԱԺ պատգամավոր Շուշան Պետրոսյանին «Հաց բերողի» հարցը չի հետաքրքրում: «NewsBook»-ի հետ զրույցում նման հայտարարություն է արել հայտնի երգչուհին, պատասխանելով այն հարցին, թե չի պատրաստվում միանալ Ազգային ժողովում իրականացվող ստորագրահավաքին՝ «Հաց բերող» Արթուր Սարգսյանի ազատ արձակելու վերաբերյալ:
Հարցին, թե չի՞ պատրաստվում արդյոք դիմել Սերժ Սարգսյանին, նա պատասխանեց. «Այդպիսի նախաձեռնություն արդեն արվել է Ազգային ժողովում: Էդմոն Մարուքյանն արդեն պատրաստել է նամակ, անձամբ ես ինչո՞ւ պետք է պատրաստեմ: Մարդկայնորեն կարող եմ իրեն առողջություն ցանկանալ: Կան կոնկրետ պատկան մարմիններ, որոնք զբաղվում են թե՛ առողջապահության բնագավառում, և թե՛ իրավապահների մեջ: Այնպես որ ուրիշ հարց տվեք»:
Ուրիշ հարցին, թե չե՞ք ստորագրել այդ նամակի տակ, Շուշան Պետրոսյանը նշեց. «Ես չեմ ստորագրել, քանի որ կարծում եմ՝ ամեն ինչ հսկողության տակ է և ամեն ինչ կկարգավորվի»: Դիտարկմանը՝ այնուամենայնիվ, չե՞ք պատրաստվում արդյոք ստորագրել նամակի տակ, Շուշան Պետրոսյանը նման կերպ արձագանքեց. «Հարց կարո՞ղ եք տալ, ուրիշ, ավելի հետաքրքիր հարց»:
Ավելի «հետաքրքիր» հարց տվեցինք՝ Շուշան Պետրոսյանն Արթուր Սարգսյանին ազատ արձակելու հասարակական պահանջին չի՞ միանալու: Նշված հարցին ու դիտարկմանը, թե չգիտենք` տեղյակ եք, թե` ոչ, բայց երիտասարդները գիշերել են Ազատության հրապարակում` «Հաց բերող»-ին ազատ արձակելու պահանջով, ԱԺ պատգամավորն արձագանքեց. «Ուրախ եմ, որ երիտասարդներն ակտիվ գործունեություն են ծավալում և իրենց հայացքներն արտահայտելու ազատ հնարավորություն ունեն»:
Հետևեք մեզ Facebook-ում