Ռեյթինգային ընտրակարգը բարկացրել է դրա հեղինակին՝ Սերժ Սարգսյանին

Համենայն դեպս այդպես է գրում Նիկոլ Փաշինյանի թերթը։ Սա, իհարկե, մի առանձին հարց է, թե ինչպես է «թունդ ընդդիմադիր» Փաշինյանի թերթն այդպիսի տեղեկություն ստացել, բայց ինչևէ։ Ուրեմն, գրում է, թե իբր Սերժ Սարգսյանին դուր չի եկել ներկուսակցական գզվռտոցը և, մասնավորապես, Արարատի մարզում տեղի ունեցած միջադեպը ՀՀԿ-ի մեծամասնական, էհ, այսինքն՝ ռեյթինգային թեկնածուների միջև։

Սերժ Սարգսյանն էլ, արբիտրի դեր ստանձնած, «բարոյախրատական» դաս է անցկացրել ռեյթինգային թեկնածուների համար․ զգուշացրել, որ վիճաբանությունները թարգեն։ Չգիտեմ, որքանով է նա անկեղծ, կամ որքանով է պատկերացնում, թե ինչպիսի պատուհաս է այդ ընտրակարգը լինելու հենց իր համար, բայց երևույթն ինքնին զավեշտալի է։ Այս մարդուն շատ հաճախ դժվար է հասկանալ։ Սկզբում «չուզենալով» նախաձեռնեց սահմանադրական փոփոխությունները և «դեմ լինելով» պարլամենտական համակարգին՝ միանձնյա որոշում կայացրեց հենց այդպիսի կառավարման կարգ հաստատել Հայաստանում։

Հիմա, «կռվով-դավով» հաստատեց այդ չարաբաստիկ ռեյթինգային ընտրակարգը և հիմա ներկուսակցական բողոքի ակցիա է կազմակերպել դրա դեմ և սեփական թեկնածուներին է «նախազգուշացնում»։ Բոլորի համար էլ ակնհայտ է, որ այդ ռեյթինգային համակարգը ինքնին ենթադրում է նման և շատ ավելի սաստիկ վիճաբանություններ։ Այդ համակարգով թիմակիցները դառնում են հակառակորդ, իսկ Հայաստանում գիտենք, թե ինչպես է ընթանում «քաղաքական պայքարը»։ Առավել ևս, երբ հաշվի առնենք, որ Սերժ Սարգսյանի հաստատած խաղի կանոններով թեկնածուները սեփական գումարներն են ծախսում ընտրարշավի վրա և նրանք շանս կունենան այդ գումարը վերադարձնել միայն եթե կատարեն առաջադրանքը և պատգամավոր դառնան։

Այսինքն, մարդիկ պայքարում են ոչ միայն և ոչ այնքան մանդատի, այլ կոնկրետ փողի՝ սեփական փողի համար։ Իսկ այս անգամ թե՛ ընտրակաշառքի «դրույքաչափերը» և թե՛ ընդհանուր ընտրարշավները հավակնում են ռեկորդային լինել նորանկախ Հայաստանի պատմության մեջ։ Այնպես որ նման միջադեպերը շարունակվելու են։

Հրանտ Ենոքյանի ֆեյսբուքյան էջից