Յուրա Մովսիսյան. «Այլ պայմաններում կարող է վերադառնամ, բայց այսօրվա դրությամբ...»

«Ռեալ Սոլթ Լեյքի» հարձակվող Յուրա Մովսիսյանը խոսել է ազգային հավաքական չհրավիրվելու, հավաքական հավանական վերադարձի ու «Սպարտակից» հեռանալու մասին:

- Ասելու ոչինչ չկա, ամեն ինչ պարզ է: Ինձ ճանաչող բոլոր մարդիկ գիտեն, թե ինչ եմ արել թե հավաքականի, թե մեր հայկական ֆուտբոլի համար: Ով էլ չգիտի, կամ չի հավատում, իրենց անձնական խնդիրն է: Ինձ համար շատ կարևոր էր երկրպագուների աջակցությունը: Մարդիկ գիտեն, որ ես միշտ պարզ եմ եղել, իմ դեմքին երբեք դիմակ չի եղել, ուրիշ դեր չեմ խաղացել: Գուցե խնդիրը դրա մեջ էր, որ ես միշտ պարզ եմ եղել, ու բոլորն իմ անելիքները լավ են իմացել, տեսել են:

Բնական է, հետաքրքիր է, թե ինչպես է խաղում հավաքականը, նայում եմ բոլոր խաղերը, կապի մեջ եմ հավաքականի որոշ ֆուտբոլիստների հետ: Արդյո՞ք փակված է հավաքական վերադառնալու հարցը: Միգուցե շուտով փակված կլինի, քանի որ ես այն ֆուտբոլիստներից չեմ, ով կնստի ու կսպասի, թե երբ կզանգեն: Բնականաբար, այլ պայմաններում կարող է վերադառնամ, բայց այսօրվա դրությամբ...

ԱՄՆ-ում ինձ շատ լավ եմ զգում: Մի քանի անգամ արդեն նշել եմ, որ նոր լիգա եմ եկել: Ես ճանաչում էի ամերիկյան ֆուտբոլը, բայց, պարզվեց, լրիվ նոր լիգա եմ եկել: Շատ առաջ է գնացել: Հետևողները գիտեն, որ ավելի շատ երիտասարդ ֆուտբոլիստներ են գալիս, դա նշանակում է, որ լիգան առաջ է գնացել, երիտասարդներ աստղերը ցանկություն ունեն այստեղ խաղալու:

Պարզ է, որ եվրոպական ֆուտբոլը շատ զարգացած է: Եվրոպական ֆուտբոլը պատմություն ունի, ամերիկյանը նոր է զարգանում: Եվրոպայից հրավեր ունեի, սակայն դժվար իրավիճակ էր: Միակ հեշտ ձևը, որ թույլ կտային ինձ հեռանալ «Սպարտակից», դա ԱՄՆ տեղափոխությունն էր: «Սպարտակում» գիտեին, որ ես վերադառնալու եմ ԱՄՆ, սկզբից էլ ասել էի նրանց, որ հետ եմ գնալու: Առաջարկներ շատ-շատ են եղել, բայց դրանք մերժվել են, ոչ իմ կողմից: Շատ տեղերից են եղել, բայց փաստն այն է, որ մնացել եմ «Սպարտակում»: Ճիշտ է, իմ սրտով չէր, պարզ է, որ ես էլ կուզենայի գնալ Գերմանիա, Իսպանիա, Անգլիա, Ֆրանսիա... Բայց այսպես ստացվեց:

«Ռեալ Սոլթ Լեյքի» հետ երկարաժամկետ պայմանագիր եմ կնքել, այնպես որ դժվար մոտ ժամանակներս տեղափոխվեմ Եվրոպա: Իհարկե, ֆուտբոլում չես կարող ոչինչ հաստատ ասել: Կարող է առաջարկ լինել, որը չկարողանամ մերժել, կամ էլ ակումբը չկրաողանա մերժել: Բայց հիմա նման առաջարկներ չկան,- նշել է Մովսիսյանը:

Աղբյուր՝ ArmFootball.com