«Անվտանգություն» այն դեպքում, երբ գլխավոր հրամանատարն ու պաշպանության նախարարը զբաղված են նախընտրական գործերով

Մի կուսակցություն, որի կերտած երկրում  անվտանգությունը մազից է կախված, իսկ առաջընթացի մասին նույնիսկ երազում  տեսնելն է երազելի, մեզ է ներկայացնում իր հերթական «ընտիր», «անզուգական»  նախընտրական կարգախոսը՝ «Անվտանգություն և առաջընթաց»:

Հանրապետականները շեշտը կրկին դնում են ժողովրդի համար ամենախոցելի կետի վրա՝ անվտանգության, ասես երկրի անվտանգության հարցն իրենք պետք է կարգավորեն, իսկ պատերազմ սկսելու դեպքում զենք են վերցնելու, իրենց որդիների հետ կանգնելու են առաջնագծում ու կռիվ են տալու թշնամու դեմ: Եթե իմ պատկերացրած անվտանգությունը համընկնում է ՀՀԿ-ի ասած անվտանգությանը, ապա ասեմ, որ ընտրության օրը՝  ապրիլին 2-ին, հասարակությունը հիշելու է մի տարի առաջվա ապրիլի 1,2,3 և  4-ը, երբ ՀՀԿ-ի չանվտանգության, իշխանության բազում բացթողումների պատճառով տեղի ունեցան աննկարագրելի դաժան մահեր ու տարածքային կորուստներ:

Հիմա ասում եք՝ անվտանգություն ու առաջընթաց է լինելու այն պարագայում, երբ  երկրի գլխավոր հրամանատարը և այնուհետև պաշպանության նախարարը զբաղված են  նախընտրական գործերով. դե գիտեք՝ մեկը ՀՀԿ-ի նախընտրական շտաբի պետն է,  մյուս էլ առաջադրված է՝ պետք է ձայն հավաքի: Այսպե՞ս եք մեր
անվտանգությունը պաշպանելու:

Ու բացի  այդ՝ առաջվա կարգախոսների՝ «Առա՛ջ, Հայաստան», «Հավատանք, որ փոխենք»-ից  հետո ի՞նչ եղավ. մենք հավատացի՞նք ձեզ. ո՛չ, դուք փոխեցի՞ք երկրում ինչ-որ  բան. ո՛չ, Հայաստանն առջընթաց գրանցե՞ց. իհա՛րկե, ոչ: Մի երկրում, որտեղ  ամեն 3-րդ ընտանիքն, ըստ պաշտոնական տվյալների, աղքատ է համարվում, մի  երկրում, որտեղ արտագաղթը հասել է աստղաբաշխական թվերի, իսկ պատերազմն ամեն րոպե տեսնում ենք, ամեն օր զինվոր է մահանում, էլ ի՞նչ անվտանգության ու  առաջընթացի մասին եք խոսում: Ախր, անպատասխանատու կարգախոսներ քիչ ընտրեք,  էլի. ձեզ համապատասխան մի բան ընտրեիք, այդպես ավելի անկեղ՛ կլինեք: Ասենք, օրինակ, «Վերարտադրության նոր հորիզոններ»...

Սաթեն Մանասյանի ֆեյսբուքյան էջից