Համախմբում, Երրորդ հանրապետություն և Դեմոկրատական կուսակցություն դաշինքի հետ համագործակցության ռեսուրս ունենք. Զոհրաբյան

Այսօր առավոտից «Բարգավաճ Հայաստան» կուսակցությունը շտաբի նիստ է անցկացնում: Կուսակցության նախագահ Նաիրա Զոհրաբյանը Zham.am-ի հետ զրույցում նշեց, որ նիստի ընթացքում կազմակերպչական հարցեր են քննարկվել մարզերի, Երևանի բոլոր տարածքային կառույցների ղեկավարների հետ :

«Կարծում եմ՝ վաղը մյուս օրը կձևավորվի կենտրոնական շտաբը իր բոլոր ստրուկտուրաներով, կնշանակվեն պատասխանատուներ՝ մամուլի, քարոզչության¸ սոցիալական ցանցերի, արտաքին կապերը համակարգող, իրավաբանական ծառայությունը: Մենք շատ ակտիվ աշխատանքի փուլ ենք մտել»,-տեղեկացրեց Զոհրաբյանը:

Թե ինչ կուսակցությունների հետ է այս պահին բանակցում կուսակցությունը և որոնք կընդգրկվեն Ծառուկյան դաշինքում, Զոհրաբյանը նշեց, որ դեռ չի կարող ասել, քանի դեռ վերջնական որոշում չի կայացվել:

«Մինչև չավարտվեն բանակցությունները ես որևէ իրավասություն չունեմ որևէ քաղաքական ուժի կամ անհատ գործչի անուն հրապարակելու: Երբ կավարտվեն բանակցությունները և կգանք հանրագումարի, թե որ քաղաքական ուժերն են ունակ իրենց ներուժը, համադրելով մեր երկրում լրջագույն փոփոխություններ անելու, բնականաբար, այդ ուժերը կլինեն դաշինքում»,-ասաց նա:

Դաշինքներով մասնակցությունը առաջիկա խորհրդարանական ընտրություններին Զոհրաբյանը ճիշտ և արդյունավետ է համարում, թեև մշտապես կարծել և այժմ էլ մտածում է, որ Բարգավաճ Հայաստան կուսակցությունը ունի բավարար ներուժ առանց որևէ դաշինքի մասնակցելու ընտրություններին:

«Բայց ստեղծված իրավիճակում, հատկապես այս ընտրական նոր համակարգով, որը ենթադրելու է ամենավերջին ձայնի քերում օպերացիան, և երբ երկրում ստեղծված է բոլոր առումներով ծայրահեղ վիճակ՝ թե´ տնտեսական, թե´ քաղաքական, թե´ բարոյահոգեբանական, իհարկե շատ ավելի արդյունավետ կլինի խոշոր դաշինքներով ընտրություններին մասնակցելը, որպեսզի ոչ իշխանական դաշտի ձայները չտրոհվեն տարբեր քաղաքական միավորների միջև»:

Վերջերս ձևավորված «Համախմբում», « Երրորդ հանրապետություն» և «Դեմոկրատական կուսակցություն» դաշինքին Զոհրաբյանը շատ դրական է վերաբերվում: Ըստ նրա՝ դաշինքի նպատակն ազնիվ է և նրա հետ հնարավոր են համագործակցության եզրեր:

« « Համախմբում» կուսակցության մեջ ինձ համար շատ հարազատ մարդիկ են՝ իմ ընկերներն ու գործընկերներն են: Նաև շատ հարգանքով եմ վերաբերում այդ դաշիքնի մնացյալ անդամներին: Կարծում եմ՝ մենք շատ լավ համագործակցության ռեսուրս ունենք: Թե ինչ սահմաններում կլինի այդ համագործակցությունը, ես այս պահին դրա իրավասությունը չունեմ ասելու: Բայց կրկնում եմ, որ իրենց օրակարգը ազնիվ է, իրենց նպատակները ազնիվ են»,-նկատեց Նաիրա Զոհրաբյանը և հավելեց, որ Ծառուկյանի դաշինքը լայն համագործակցության հնարավորութուններ է տեսնում առհասարակ բոլոր այն քաղաքական միավորների հետ, որոնց նպատակն ընդամենը քաղաքական դաշտում, խորհրդարանում տեղ զբաղեցնելը չէ, այլ նպատակը մեր երկրում «մետաստազներ տված համակարգային խնդիրներին լուծում տալն է»:

Անի Շաբոյան