Կարեն Կարապետյանը ձեռնո՞ց է նետում Սերժ Սարգսանին

Հունվարի 13-ին կայացած վարչապետի հաշվետու մամուլի ասուլիսի ժամանակ մի հիշարժան դրվագ գրանցվեց, որը արժանի է ուշադրության: Լրագրողներից մեկը Կարապետյանին հարց տվեց, որի իմաստը կայանում էր հետևյալում՝ Սերժ Սարգսյանն արդեն 5-րդ քարոզարշավին է մասնկացելու և կարող է արդյո՞ք Կարեն Կարապետյանը նշել գոնե երեք ռազմավարական խոստում և ի կատար ածել: Ինչին իր պատասխան վարչապետն ասաց, որ նախևառաջ պետք է հստակեցնել ասուլիսի ֆորմատը և նշեց, որ նա ներկայացնում է իր ղեկավարած կառավարության 100 օրվա հաշվետվությունը և եթե կան հարցեր դրա և իր անձի վերաբերյալ, ապա նա պատրաստ է պատասխանել այդ հարցերին, իսկ վերոնշյալ հարցը պետք է տալ Սերժ Սարգսյանին: Պատասխանելով այն հարցին, թե ինչպես է պատրաստվում համոզել ժողովրդին, որ քվերակեն Հանրապետականի օգտին, Կարապետյանն ասաց , որ համոզելու է իր գործով, անգամ եթե չլինի ՀՀԿ-ի ցուցակում:

Հայաստանի իշխանական համակարգում ձևավորվել է մի ավանդույթ, ըստ որի բոլոր կարգի իշխանավորները, անկախ իրավիճակից և անկախ հարցից իրենց հրապարաակային ելույթներում աջակցում են Սերժ Սարգսյանին: Իսկ ահա այս դրվագն այն եզակի դեպքերից է, որ վարչապետի պես կարևոր պաշտոն զբաղեցնող անձը չի լծվում Սերժ Սարգսյանի օգտին անմոռաց քարոզին: Այս դրվագը կարելի է տարբեր կերպ մեկնաբանել, օրինակ, որ Կարեն Կարապետյանն ինքնուրույն քաղաքական ֆիգուր դառանալու փորձ է անում և նշում , որ այսուհետև պատասխանատվություն է կրելու միայն իր կաբինետի կատարած քայլերի համար: Իսկ նախկին կառավարությունների գրանցած ձախողումների կամ Սերժ Սարգսյանի չկատարած խոստումների համար պատասխանատու են նախկին իշխանավորները և Սերժ Սարգսյանը:

Ինչպիսի զարգացում կստանա այս դրվագը և արդյոք զարգացում, կստանա, ցույց կտա ժամանակը, սակայն մենք ևս մեկ անգամ փաստենք՝ ի հեճուկս ձևավորված ավանդույթի, հրապարաակային ելույթի ժամանակ Կարեն Կարապետյանը ձեռնպահ մնաց նրա օգտին քարոզից:

Տիգրան Ափունց