Սերժ Սարգսյանի համար միակ վտանգավոր ուժը Սեյրան Օհանյանն է և նրա թիմը

Բաղրամյան 26-ի մեր աղբյուրները նշում են, որ Սերժ Սարգսյանի միակ մտավախությունը Սեյրան Օհանյանի դաշինքի պոտենցիալ վտանգը կարող է լինել:

Ըստ այդ աղբյուրի, Բաղրամյան 26-ը ցուցում է տվել իր մարզպետներին և քաղաքապետներին առանձնապես չխանգարել Արթուր Բաղդասարյանի թիմին և «Ազատ դեմոկրատներ» դաշինքին, «Ելք»-ի մասով ցուցում կա նույնիսկ փոքրիկ աջակցություն ցուցաբերել, թեև, ըստ մեր աղբյուրի, իշխանությունը բավականին «ժլատ» է գտնվել և ռեսուրսային սովի մեջ է պահում «Ելք»-ին, իսկ ՀԱԿ-ի մասով ռեսուրսային աջակցությունը դրված է Խաչատուր Սուքիասյանի վրա: Ցուցում կա բոլորին աջակցել «Դաշնակցությանը», որպեսզի այդ ուժը հաղթահարի 5 տոկոսանոց արգելքը:

Ըստ էության, Սերժ Սարգսյանի ամբողջական վերահսկողությունից դուրս երկու ուժ է գործում՝ Սեյրան Օհանյանի դաշինքը և Ծառուկյանի թիմը: Եթե Ծառուկյանի վտանգը նրա ռեյտինգն է և իշխանությունները փորձելու են խանգարել այս դաշինքի ներկայացուցիչներին, որպեսզի նրանք ճկարողանան «փող բաժանել», և վատ պայմաններ ունենան ՀՀԿ-ի ռեյտինգային անդամների համեմատ, ապա Սեյրան Օհանյանի թիմի վտանգը նրա ընդգծված քաղաքական դիմագծի մեջ է, որը Սերժ Սարգսյանի համար ընկալվում է՝ որպես վտանգավոր հակառակորդ: Եվ գործող նախագահը ցուցում է իջեցրել իր ենթականերին, ամենուրեք խանգարել այս ուժին տեղերում գործունեություն ծավալվելու համար:

Ըստ նույն աղբյուրի, Բաղրամյան 26-ում հույս ունեն, որ փողի գործոնն ամեն ինչ կանի, և Սեյրան Օհանյանի թիմը, ըստ էության, այս տիրույթում մեծ հաջողություն չի կարող արձանագրել: Եվ միակ վտանգն այն է, որ վերջին 15 օրվա ընթացքում երկրի մթնոլորտը քաղաքական դառնա և ընտրությունները փոքր-ինչ սկսեն նմանվել նախագահական ընտրություններին, և այստեղ Սերժ Սարգսյանը կարող է ունենալ լուրջ պրոբլեմներ:

Ըստ նույն աղբյուրի, գործող նախագահի շրջապատում կա նաև պահեստային տարբերակը. մթնոլորտի փոփոխության պարագայում կտրուկ ակտիվացնել գործող վարչապետ Կարեն Կարապետյանին, սակայն վերջինիս ակտիվացման պարագայում կարող է առաջանալ մեկ այլ պրոբլեմ՝ Կարեն Կարապետյանի դերն ու նշանակությունը իշխող վերնախավում կարող է կտրուկ մեծանալ, ինչը մեկ այլ տիպի վտանգ է պարունակում Սերժ Սարգսյանի համար, և այդ իմաստով Կարեն Կարապետյանի վտանգը պակաս չէ Սեյրան Օհանյանից՝ հատկապես, որ բոլոր գաղտնի հարցումները ցույց են տալիս, որ իշխող վերնախավում միակ ընդգծված վարկանիշ ունեցող անձը հենց Կարեն Կարապետյանն է, իսկ Սերժ Սարգսյանի վարկանիշը վտանգավոր աստիճանի ցածր:

Հենց այս համատեքստում էլ, հավանաբար, պետք է հասկանալ այն լայնամաշտաբ հակաքարոզչությունը, որն իրականացվում է Բաղրամյան 26-ի կողմից Սեյրան Օհանյանի և իր թիմակիցների դեմ:

Հակոբ Կարապետյան