Մեքենայի անիվները չեն գողացել, տերն է հանել. ոստիկանությունը պարզաբանում է
Երեկ Աշոտ Սարգսյան տվյալներով ֆեյսբուքյան օգտատերն իր էջում առանց անիվների մեքենայի լուսանկար էր հրապարակել՝ նշելով, որ առավոտը բարի չէր իր հարևանի համար ու օգտատիրոջ ներկայացրածով մեքենայի անիվները գողացել են։
ՀՀ ոստիկանությունն այս կապակցությամբ ներկայացրել է պարզաբանում, համաձայն որի՝ մեքենայի տերը փոխանցել է, որ իր մեքենայի անիվները չեն գողացել:
«Նախ տեղեկացնենք, որ ոստիկանությունում նշված մեքենայի անիվների գողության վերաբերյալ ահազանգ չի հնչել։ Այսուամենայնիվ, հրապարակման հիման վրա ոստիկանները հայտնաբերել են մեքենայի տիրոջը։ Վերջինս իր վրդովմունքն է հայտնել մեքենան լուսանկարելու և լուսանկարը սոցցանցում հրապարակելու կապակցությամբ։ Նա հայտնել է նաև, որ անիվները չեն գողացել. ինքն է հանել վերանորոգելու համար։
Ոստիկանությունը այդ օգտատիրոջը և առհասարակ բոլորին հորդորում է զարկ չտալ երևակայությանը, զերծ մնալ իրականության հետ որևէ աղերս չունեցող հրապարակումներ և մտացածին եզրահանգումներ անելուց»,-ասված է ոստիկանության պարզաբանման մեջ
Հիշեցնենք, օգտատերը գրել էր.
«Առավոտը բարի չեր հարևանիս համար, մի քանի օր առաջ նույնը արել են մեկ այլ հարևանի մեքենայի հետ: Այսինք մենք ունենք սիստեմատիկ գողությունների հետ: Եթե հանցագործը վերադառնում է հանցագործության վայր, դա շատ վատ է: Ու նման տեսարանների կարող ենք հանդիպել քաղաքի տարբեր բակերում: Ոստիկանության հարգելի աշխատակիցներ այս վիճակին պետք է վերջ տրվի, չեմ կարծում որ ժողովրդավարությունը նշանակում է ամենաթողություն»։
Իսկ ոստիկանության ներկայացրած պարզաբանման ներքեւում էլ նույն օգտատերը մեկնաբանություն է թողել, որ վերահաստատում է իր խոսքերն ու կարծում, որ մեքենայի տերը պարզապես չի ցանկացել հաղորդում ներկայացնել ոստիկանությանը:
Ոստիկանության պարզաբանումից հետո օգտատերն արձագանքել է.
Ես իմ գրած ամեն բառի համար պատասխանատու եմ, եթե տուժածը չի ցանկակացել հայտնի ոստիկանություն, բայց բակի բնակիչներին ասել է գողացել են, դա չի հերքում այն փաստը, որ նման դեպք տեղի է ունեցել: Այդ գրառմանս տակ էլ բազմաթիվ մարդիկ նկարներ են հրապարակել իրենց բակերում կատարված գողությունների վերաբերյալ: Իմ կոնտակտային համարը կարող եմ տրամադրել, համեցեք խոսեք բակի բնaկիչների հետ:
Հ.Գ. իսկ տիրոջ պետհամարանիշի լուսանկարը ես եմ տրամադրել ոստիկամությանը, որ կապ հաստատեն հետը:
Հետևեք մեզ Facebook-ում