0038 հրամանի արդյունքում կանխվել է բանակի ներգրավվածությունը, ներքաշումը ցույցերին, այն «Մարտի 1-ի» իրադարձությունների հետ կապ չունի․ Հայկ Ալումյան (տեսանյութ)
ՀՀ 2-րդ նախագահ Ռոբերտ Քոչարյանի գործով և՛ քրեական վերաքննիչ դատարանի դատավորի ընտրությունը, և՛ դատավարության ամբողջ ընթացը, և՛ դատավորի կողմից կայացրած որոշումը տեղի են ունեցել օրենքի բազմաթիվ կոպիտ ու ակնհայտ խախտումներով։ Այսօր լրագրողների հետ զրույցում նման հայտարարություն արեց Ռոբերտ Քոչարյանի շահերի պաշտպան Հայկ Ալումյանը։ Նրա խոսքով՝ գործը նախագահող դատավորը չի պատասխանել մի շարք փաստարկների, որոնք ներկայացրել է պաշտպանական կողմը, ավելին՝ նա վստահեցրեց, որ այդ հարցադրումներին պատասխան չեն ունեցել նաև քննիչներն ու դատախազը։ Հաղորդում է Tert.am-ը:
«Պատասխաններ չունենալով՝ դատավորը պարզապես որոշել է անտեսել հարցադրումները։ Մի շարք փաստարկներ, որոնց դատավորն անդրադարձել է, կա՛մ ճիշտ չի ընկալել, հետևաբար, նաև հակափաստարկները կապ չունեն փաստարկների հետ, կա՛մ ճիշտ է ընկալել, բայց չի կարողացել հստակ պատասխաններ տալ՝ սահմանափակվելով ճշմարտանման և իմաստ չպարունակող նախադասություններով»,- ասաց նա։
Ալումյանը դատավարությունը խայտառակ որակեց՝ հավելելով, որ այն եղել է խայտառակ խախտումներով։ Նա հիշեցեց, որ իրենք Վերաքննիչ դատարանի դատավորին բացարկ են ներկայացրել՝ պատճառաբանությամբ, որ օրենքի հիման վրա չէ նրա ընտրությունը։ Փաստաբանը նկատեց, որ հայտարարվել է, թե վիճակահանությամբ է ընտրվել դատավորը, բայց շեշտեց, որ վիճակահանության վերաբերյալ որևէ արձանագրություն չեն ներկայացրել։
«Ի դեպ, ձեզ նաև ասեմ, որ դատական քննության ժամանակ դատավորին բացարկ ներկայացրեց քննիչը, և դա բավականին հետաքրքրական էր, քանի որ նա նշեց, որ գործը տվյալ դատավարի համար բարդ է, և դատավորին ակնարկեց, որ իր ուժերից վեր կլինի այս գործով կայացնելու օրինական որոշում։ Դատավորն իրեն քննիչի ակնարկներից վիրավորված համարեց, նույնիսկ միջնորդությունը չքննեց»,- նշեց Ալումյանը։
Հայկ Ալումյանը խոսեց նաև շահարկվող 0038 հրամանի մասին՝ նկատելով, որ իրավական դաշտում որևէ խնդիր չկա, և այն ավելի շատ շահարկվում է հուզական դաշտում։ Ըստ Ալումյանի՝ 0038 հրամանն ինքն իրենով չի ներկայացնում որևէ խնդիր։ Ալումյանը վստահեցրեց՝ 0038 հրամանի արդյունքում կանխվել է բանակի ներգրավվածությունը, ներքաշումը ցույցերին։
«Հստակ տվյալներ կային, որ աշխատանքներ են տարվում բանակի ներսում, որպեսզի զինվորականերին բերեն հրապարակ, որ զինվորականները նույնպես մասնակցեն քաղաքական պրոցեսներին։ Հստակ կարող եմ ասել, որ 0038 հրամանը որևէ հակասահմանադրական կամ հակաօրինական իրավիճակ չի ստեղծել, սրանում կհամոզվեք, երբ ամբողջ տեքստին դուք էլ ծանոթանաք։ Պետք է հստակ պատկերացնեք, որ 0038 հրամանը և «Մարտի 1-ի» իրադարձություններն իրար հետ փողկապակցված չեն»,-ընդգծեց Հայկ Ալումյանը։
Փաստաբանը հայտարարեց, որ 2008 թ․ հստակ տեղեկություններ են եղել, որ բանակը ցանկանում են ներքաշեն ցույցերի մեջ, որպեսզի, ինչպես ինքը որակեց, «բանակը զենքը շրջի օրվա իշխանության դեմ»։ Ալումյանը հիշեցրեց, որ ցույցերի օրերին արդեն իսկ գործող ՊՆ 2 փոխնախարար միացել էին ցույցերին, միացել էր նաև գործող զինդատախազը։ Հայկ Ալումյանն ընդգծեց, որ 0038 հրամանը կանխել է բանակի ներգրավվածությունը քաղաքական գործընթացներին։
Մանրամասները՝ կից տեսանյութում:
Հետևեք մեզ Facebook-ում