Որոշումը պետք է ստորագրեն բոլոր 6 պետությունների ղեկավարները. պարզաբանում են ՀԱՊԿ-ում
Հավաքական անվտանգության պայմանագրի կազմակերպության (ՀԱՊԿ) նոր գլխավոր քարտուղարի նշանակման մասին որոշման ստորագրման ժամկետները դեռևս հստակ չեն, փաստաթուղթը պետք է ստորագրեն բոլոր վեց անդամ պետությունները:
«Փաստաթղթում նոր քարտուղարի նշանակման ժամկետ ամրագրված չէ», - ասաց ՀԱՊԿ քարտուղարության խոսնակ Վլադիմիր Զայնետդինովը ՌԻԱ Նովոստիին:
Այսօր ավելի վաղ Բելառուսի պաշտոնական աղբյուրները հաղորդեցին, որ նախագահ Լուկաշենկոն ստորագրել է ՀԱՊԿ հավաքական անվտանգության խորհրդի որոշման նախագիծը՝ իր թեկնածուին՝ Ստանիսլավ Զասին կառույցի գլխավոր քարտուղար նշանակելու մասին: ՀԱՊԿ քարտուղարության խոսնակը պնդել է, թե տեղյակ չէ՝ Լուկաշենկոյից բացի որևէ այլ առաջնորդ ստորագրել է այդ փաստաթուղթը, թե՝ ոչ:
Մինչ այս հաղորդվել էր, որ Բելառուսի թեկնածուն հանդիպումներ է ունեցել կառույցի անդամ բոլոր երկրների իշխանությունների հետ, բացառությամբ՝ Հայաստանի:
Հայաստանի արտգործնախարարության խոսնակ Աննա Նաղդալյանը նախօրեին հայտարարել էր, որ նման հանդիպում Երևանում նախատեսված չէ:
Հետևեք մեզ Facebook-ում