Ադրբեջանն ակտիվորեն պատրաստվում է պատերազմի. Արցախը պետք է համալրվի նորագույն զենքերով ու ռազմական առումով դառնա ինքնաբավ

Արցախի Հանրապետության Զինված ուժերը կհամալրվեն ժամանակակից զինտեխնիկայով։ Այս մասին խորհրդարանում կայացած լիագումար նիստին ասել է Արցախի նախագահ Բակո Սահակյանը:

«Առանձին ուշադրության կենտրոնում եղել եւ մնում են բանակաշինության, անվտանգության, ինչպես նաև քաղաքացիական պաշտպանության ոլորտները: Այսուհետ էլ արվելու է հնարավոր ամեն ինչ բանակի մարտունակության հետևողական բարձրացման, զինված ուժերը ժամանակակից զինտեխնիկայով համալրման, քաղաքացիական պաշտպանության համակարգի ամրապնդման ու արդիականացման, զինծառայողների, վետերանների եւ հաշմանդամների սոցիալական խնդիրների լուծման ուղղությամբ»,– ասել է Բակո Սահակյանը։

Ադրբեջանն ակտիվորեն պատրաստվում է պատերազմի`գնվում են նոր զենքեր Բելառուսից, Պակիստանից, Իսրայելից և այլ երկրներից: Այդ երկիրն ավելացնում է ռազմական արդյունաբերության սեփական համալիրի թե արտադրանքի քանակը, թե տեսականին: Դա պատերազմի նախապատրաստությունների բաղադրիչներից մեկն է: Նրանք նվազեցնում են իրենց ռազմական կախվածությունը մի կենտրոնից`Մոսկվայից ու դիվերսիֆիկացնում ռազմա-տեխնիկակական կապերի աշխարհագրությունը: Բաքվի համար ռազմական առումով երկրորդ Իսրայելի դերակատարում է ստանձնելու Թուրքիան ու Պակիստանն`այդ թվում հրթիռային, հրետանային համակարգերի, անօդաչուների մատակարարման, սպայական կազմի պատրաստման առումներով:

Ինչ վերաբերվում է Արցախի նախագահի հայտարարությանն, ապա ՊԲ-ի զինումը նոր զինատեսակներով կարևոր հանգամանք է Բաքվի համար`զսպիչ դերակատարման և ռազմական ագրեսիան սկսելուց առաջ պլանների վերանայման առումով: Արցախը պետք է ունենա սեփական ռազմաարդյունաբերական համալիրը, որը կարող է լինել ՀՀ-ի համալիրի հետ կոոպերացիայի մեջ`այդ թվում տեխնիկական, մասնագետների փոխանակման, պատրաստման առումներով:

Ռազմական առումով Արցախը պետք է լինի հնարավորինս ինքնաբավ ու զինված նորագույն զենքերով`աշխարհագրական դիրքին `լեռնային, զուգահեռ պետք է ստանալ նաև ռազմական առավելություններ Ադրբեջանի նկատմամբ`առաջնագծում ինժեներական նոր կառույցների, իսկ թիկունքում`բավարար քանակությամբ զենքերի ու զինամթերքի առումներով: ՀՀ-ից օգնություն իհարկե լինելու է, սակայն պատերազմի ժամանակ Ադրբեջանն առաջին հերթին փորձելու է շարքից հանել Արցախ-ՀՀ կապող ճանապարհները`Լաչինի միջանցքն ու Քարվաճառի ճանապարհը:

Կարևոր է նաև քաղպաշտպանության համակարգի ստեղծումն ու Լևոն Մնացականյանի ԱԻՆ նախարարի նշանակումը կարող է նպաստել նաև այդ ոլորտի զարգացմանը`պատերազմի դեպքում քաղաքացիների պաշտպանությունը, ռմբապաստարանների կառուցումն ու մոբռեսուրսի հետ կապված խնդիրները նույնպես օգնություն են`ամուր թիկունքն առաջնագծի համար լրացուցիչ խթան է:

Արտեմ Բալասանովի ֆեյսբուքյան էջից