ԱԱԾ. Ինչպես զգուշանալ գործակալներից ու չհայտնվել ծուղակում

Ազգային անվտանգության ծառայությունը Հայաստանի քաղաքացիներին հորդորում է զգույշ լինել այլ երկրներ այցելելիս, նշելով մի շարք խորհուրդներ ծուղակում չհայտնվելու համար: Դրանք այսօր Ծաղկաձորում ԶԼՄ-ների ներկայացուցիչների համար անցկացվող սեմինարի ժամանակ ներկայացրել է ԱԱԾ գիտաուսումնական կենտրոնի տնօրեն Արմեն Քինակցյանը:

ԱԱԾ պաշտոնյան նախ նշեց, որ  զրույցի չբռնվեն այն անձանց հետ, ովքեր  ինչ-որ բան են պահանջում կամ հակառակը, առաջարկում են: Պետք է սովորել կտրուկ «ոչ» ասել: Նաև խորհուրդ է տրվում ոչ մի պարագայում չցուցադրել դրմապանակը, ոչ ոք չպետք է տեսնի դրա պարունակությունը:

«Հիշեք, որ հաճելի մարդկանց հետո ծանոթությունը երբեմն կարող է մեղրային թակարդ լինել: Մեղրային թակարդը հենց հատուկ ծառայությունների գործելաճն է, մի վախեցեք կոպիտ կամ տարօրինակ երևալ, դեն նետեք զոռով ձեզ տրված իրերը»,- ասում է Արմեն Քինակցյանը:

ԱԱԾ մասնագետն ասում է, որ հատուկ ծառայությունները պատահական մարդկանց չեն ընտրում, այնպես չէ, որ ցանկացած ՀՀ քաղաքացի կարող է արտերկրում հայտնվել հատուկ ծառայությունների թիրախում: Նախօրոք աշխատանք է տարվում, թե ով կարող է տեղեկատվության աղբյուր լինել:

«Եթե ինչ-որ բան այնպես չէ, բացականչեք՝ ոստիկանություն: Աֆրիկյան և ասիական երկրներում կրկնակի զգոն եղեք, քանի որ ոստիկանությունը կարող է ձեզ չպաշտպանել: Այդ դեպքում պետք է պահանջել հյուպատոսին»,- խորհուրդ է տալիս Արմեն Քինակցյանը: