ԱԺ-ում 4-5 կուսակցության փոխարեն` ընդամենը 3-ը, և ռեյտինգային ընտրակարգով առոք-փառոք ընտրված նոր «հեղափոխական» բարոններ

Ընկերներ ջան

Ընտրությունների արդյունքներով ցանկանում էի ևս մեկ դիտարկումով ձեզ հետ կիսվեի։ Երևի հիշում եք, թե ինչ համառությամբ ՀՀԿ-ն դիմադրեց Ընտրական օրենսգրքի փոփոխությանը, հույս ունենալով, որ խառը համամասնական-ռեյտինգային ընտրակարգը կաշխատի իր օգտին, իսկ ՀՅԴ-ն էլ, թեև քվեարկեց փոփոխությունների օգտին, արեց դա կիսատ-պռատ, արդյունքում տառացիորեն մեկ ձայն չհերիքեց օրենքը փոխելու համար։

Արդյունքում ինչ ստացանք բոլորս՝ փողոցները հեղեղված ռեյտինգային թեկնածուների պաստառներով և բաններներով (անտեղյակներին ասեմ՝ մեկ բանները 100$ և ավել արժի երկու նախընտրական շաբաթվա համար, միայն Երևանում հազարավոր բաններներ են վարձվել Իմ Քայլի և մնացածների կողմից), Ազգային ժողովում 4-5 կուսակցության փոխարեն` ընդամենը 3-ը, և ռեյտինգային ընտրակարգով առոք-փառոք ընտրված նոր "հեղափոխական" բարոններ։ Նույն ՀՀԿ-ն և ՀՅԴ-ն, եթե աջակցեին նոր ընտրակարգին, այսօր մեծ հավանականությամբ կհայտնվեին ԱԺ-ում, սակայն նրանց քաղաքական կարճատեսությունը բումերանգի պես վերադարձավ, ու խփեց հենց իրենց, բայց և նաև իրենց ընտրողներին՝ այսօր ընտրողների 15%-ի ձայնը փոշինալով, արդյունքում ներկայացված չի Ազգային ժողովում, և դա աննախադեպ երևույթ է՝ համարյա 200 000 իրական ընտրող փաստացի զրկված է քաղաքական ներկայացուցչությունից։

Ես հուսով եմ, որ սա վերջին ընտրություններ էին այս անհեթեթ օրենքով, և որ մենք հաջորդ ընտրությոոններին արդեն կգնանք բարենորոգված ընտրական օրենսդրությամբ, որը վերացնում է ռեյտինգային ընտրակարգը, փոխարենը նախատեսում է թեկնածուների պարտադիր փրայմերիզ, իջեցնում է ընտրական շեմը, և ընդարձակում է Ազգային ժողովում պարտադիր ներկա կուսակցությունների թիվը՝ դա փոքրամասնության իրավունքների երաշխավորման նորմալ մեխանիզմ է, և կծառայի երկրում քաղաքական լարվածության նվազմանը։ Մինչ այդ, իրական քաղաքական պայքարը կտեղափոխվի այլ հարթակներ, արդեն հիմա դա տեղի է ունենում, ուստի տխրելու առիթ չեք ունենա։ Բոլորիդ լավ օր եմ ցանկանում, առանց տխրության։

Ավետիք Չալաբյանի ֆեյսբուքյան էջից