ԲՀԿ-ն հաղթեց Ծառուկյանի հարազատ Կոտայքում, պարտվեց՝ Փաշինյանի հարազատ Տավուշում

Ինչպես արդեն տեղեկացրել ենք դեկտեմբերի 9-ին կայացած խորհրդարանական ընտրությունների արդյունքներով խորհրդարան է անցնելու երեք ուժ`

«Իմ քայլը» դաշինք,
Բարգավաճ Հայաստան կուսակցություն,
Լուսավոր Հայաստան կուսակցություն:

Մեր նախորդ հրապարակմամբ արդեն ներկայացրել ենք «Իմ քայլը» դաշինքի ձայները՝ ըստ ընտրատարածքների:

Այս հրապարակմամբ ներկայացնում ենք ԲՀԿ-ի հավաքած ձայները:

Այս ընտրություններում ԲՀԿ-ն կարողացավ հավաքել ընդամենը 103 հազար 837 ձայն, գրեթե 4 անգամ պակաս նախորդ ընտրությունների արդյունքից, որի ժամանակ հավաքել էր 428 հազար  836 ձայն:

Ինչպես և սպասվում էր, ԲՀԿ-ն ամենաշատ ձայները հավաքեց հարազատ Կոտայքի մարզում՝ 19  հազար 275: Սակայն եթե բհկ-ական մարզ լինելը հակադրենք «Իմ քայլը» դաշինքի ստացած ձայներին, ապա կարող ենք ասել, որ մարզում ԲՀԿ-ն պարզապես խայտառակ պարտություն է կրել: «Իմ քայլը» դաշինքն այստեղ շնորհիվ Սասուն Միքայելյանի և մարզպետ Ռոմանոս Պետրոսյանի հավաքել էր 79 հազար 254 քվե: 

ԲՀԿ-ից այս ընտրատարածքում առաջադրվել էր Գագիկ Ծառուկյանի թիկնազորի պետ Էդուարդ Բաբայանը, ով հավաքել է 7 472 ձայն և Ծառուկյանի դստեր ամուսինը՝ Դավիթ Մանուկյանը՝ 4 560 ձայն:

Հաջորդ ամենաշատ ձայներ բերած ընտրատարածքը թիվ 6-ն , որն ընդգրկում է Արմավիրի մարզը:
Այստեղ ԲՀԿ-ն կարողացել է հավաքել 11 հազար 963 ձայն: Ռեյտինգային ընտակարգով Արմավիրի մարզում առաջադրվել էին ԱԺ պատգամավոր Արայիկ Աղաբաբյանը և նախկին մարզպետ Գագիկ Միրիջանյանը:

Թիվ 11 ընտրատարածքում՝ Շիրակի մարզում  ԲՀԿ-ն «գոլդ» թիվ է հավաքել՝ 11 հազար 141 ձայն:

Ռեյտինգային թեկնածուներից այստեղ առաջադրվել էին Աժ պատգամավորներ Վարդևան Գրիգորյանը, Վարդան Ղուկասյանը, սպորտի և երիտասարդության հարցերի նախկին նախարար Լևոն Վահրադյանը:

Լոռու մարզում ԲՀԿ-ն կարողացել է հավաքել 9261 ձայն: Ռեյտինգային ընտրակարգով այստեղ առաջադրվել էր պատգամավոր Վանիկ Ասատրյանը:

ԲՀԿ-ն ամենաքիչ թվով ձայները հավաքել է Նիկոլ Փաշինյանի հարազատ մարզում Տավուշում:

Այստեղ առաջադրված թեկնածուները ԲՀԿ-ին կարողացան բերել ընդամենը 2695 ձայն:

Պատրաստեց Ակաթի Վահանյանը