Փաշինյանի թիմում պաշտոնների համար գզվրտոցն արդեն սկսվել է (Տեսանյութ)

Այսօր նախկին և ներկա իշխանությունների «հայտնի» կառույցին մոտ կանգնած «լրատվամիջոցը» ավետել է այն մասին, որ Արարատ Միրզոյանը ընտրվելու է ԱԺ նախագահի պաշտոնում, իսկ նրա տեղը գալու է ներկայիս ԱԱԾ-ի պետ Արթուր Վանեցյանը: Իր հերթին Արթուր Վանեցյանի տեղը նստելու է Ֆելիքս Ցոլակյանը:

Հաշվի առնելով այն հանգամանքը, թե որ լրատվամիջոցն է այս լուրը տարածել, այն իսկական խառնաշփոթ է առաջացրել Փաշինյանի շրջապատում:

Հաշվի առնելով այն պաշտոնը, որն այսօր զբաղեցնում է Արարատ Միրզոյանը, իսկ այսօր դա համարվում է փաստացի Փաշինյանի առաջին տեղակալի կարգավիճակի անձ, դա ենթադրում է նաև այդ դիրքի համար կատաղի պայքար իշխանության կուլիսներում:

Վանեցյանի հայտը` զբաղեցնել այդ պաշտոնը, հասկանալի է: Նա այսօրվա ամենատեղեկացված մարդկանցից մեկն է Փաշինյանի շրջապատում: Մյուս կողմից հասկանալի է, որ նա ունի շատ չուզողներ և ամենա կարևորը` այդ դիրքի համար մրցակիցներ:

Եվ ահա այսօր, իշխանության մեջ «ազատ նկարչի» կարգավիճակ ունեցող Լևոն Բարսեղյանի շուրթերով հանրությանը հրամցվեց այն միտքը, թե Արարատ Միրզոյանի պաշտոնին չեն կարող հավակնել ոչ միայն Վանեցյանը, այլև ներկայիս ուժայիններից որևէ մեկը՝ հաշվի առնելով նրանց անցյալ գործունեությունը:

Փաստացի կարելի է արձանագրել, որ «մեշոկ պապիի»՝ ի դեմս ՀՀԿ-ի, վերացումից հետո Փաշինյանի շրջապատում սկսվելու է ներիշխանական «պատերազմ», որը ոմանք փորձելու են փաթեթավորել տարատեսակ քաղաքական և հանրային հիմնավորումներով:

Իսկ թե ինչ կոնֆիգուրացիա կստանա Փաշինյանի նոր կաբինետը, պարզ կդառնա մոտ ժամանակներս:

Այդտեղից էլ հավանաբար կսկսվի, այսպես կոչված, «հների» և «նորերի» միջև կատաղի գզվրտոցը՝ իր բոլոր տեսակի գործիքակազմերով՝ գաղափարական բարձրագոչ ձևակերպումներով, տեղեկատվական արտահոսքերով, միմյանց վրա «կեղտեր» տարածելով և այլն:

Արտակ Հակոբյան

Լուսանկարը՝ Ալեն Սիմոնյանի ֆեյսբուքյան էջից