ՈւԱԶ, անասնապահական ֆերմա, 7 մլն դրամ, հողակտոր, տներ. Սասուն Միքայելյանի պատկառելի ունեցվածքը (Տեսանյութ)

«Իմ քայլը» դաշինքի պատգամավոր, դաշինքին ամենաշատ ձայն բերած Սասուն Միքայելյանը Կենտրոնական ընտրական հանձնաժողով է ներկայացրել վերջին մեկ տարվա ունեցվածքի հայտարարագիրը, որտեղ բավականին պատկառելի տվյալներ են գրանցված:

Որպես անշարժ գույք Միքայելյանը հայտարարագրել է՝

128  քմ և 242 քմ մակերեսներով 2 բնակելի տուն, առաջինը՝ Երևանի Արշակունյաց պողոտայում, մյուսը՝  Հրազդան քաղաքում:

Արդյունաբերական ընդերքօգտագործման 1 հողամաս,

4 վարելահող,

Բնակելի կառուցապատման համար նախատեսված երկու հողամաս,

Ծաղկաձոր և Հրազդան քաղաքներում մեկական շինություն,

Սևան ազգային պարկում 1 հողակտոր, որը  տնօրինում է վարձակալական հիմունքներով:

1 անասնապահական համալիր և հողակտորներ:

Անշարժ գույքի մի մասը Սասուն Միքայելյանը տնօրինում է սեփականության, մի մասն էլ՝  համասեփականության իրավունքով:

Որպես շարժական  գույք՝ Միքայելյանը գրանցել է 1978 թվականի արտադրության Ուազ ավտոմեքենա:

Մեկ տարվա ընթացքում Միքայելյանը ստացել է 6 մլն 849 հազար 850 դրամ, որից 600 հազար դրամը  գոյացել է պատգամավորական աշխատավարձից:

Դրամական միջոցները կազմել են 5 մլն դրամ:

Ս/թ մարտի 30-ին Միքայելյանը Բարձրաստիճան պաշտոնատար անձանց էթիկայի հանձնաժողով էր ներկայացրել 2017 թվականի տարեկան հայտարարագիրը:

Ըստ հայտարարագրի 2017 թվականին Միքայելյանը ստացել է 400 000 դրամ եկամուտ, որը գոյացել է աշխատանքի վարձատրությունից:

Տարվա սկզբում Սասուն Միքայելյանն ունեցել է 7 մլն դրամ դրամական միջոց, որը տարվա ավարտին նվազել էր՝ դառնալով 1 մլն դրամ:

2017 թվականին պատգամավորը 3 հողակտոր է ձեռք բերել հետևյալ արժեքներով՝

1 մլն դրամ,
1 մլն 700 հազար դրամ,
400 հազար դրամ:

Ձեռք է բերվել նաև 1 արտադրական նշանակության շինություն՝ 1 մլն 700 հազար  դրամ արժեքով:

Պատգամավորական պաշտոնի ստանձման հայտարարագրում, որը ներկայացվել է 2017 թվականի հունիսի 5-ին, Սասուն Միքայելյանը գրանցել է 5 անավարտ շինություն, 1 առանձնատուն, 1 բնակարան, 6 հողակտոր և հողին ամրակցված 1 անշարժ գույք:

Որպես շարժական գույք՝ պատգամավորը գրանցել է UAZ 469 մոդելի ավտոմեքենա:

Սասուն Միքայելյանը գրանցել է մեկ բաժնեմաս՝ 100 000 դրամ արժեքով:

Պաշտոնի ստանձման հայտարարագրում թանկարժեք գույք, դրամական միջոցներ և եկամուտներ հայտարարագրված չէ:

Տեսանյութը՝ քիչ անց:

Պատրաստեց Ակաթի Վահանյանը