Ադրբեջանի մեջլիսի պատգամավորը ՀՀ ԱԺ արտահերթ ընտրությունների մասին

Ադրբեջանի Միլի մեջլիսի (խորհրդարան) պատգամավոր Այդին Միրզազադեն ՀՀ ԱԺ արտահերթ ընտրությունները «հակաժողովրդավարական» և «ոչ թափանցիկ» է անվանել:

Նրա խոսքով՝ արտահերթ ընտրություններին ընտրողների 48,63%-ի մասնակցության «պատճառը պարզ է, քանի որ 2,6 միլիոն մարդ բացակայում է երկրից»:

«Հայաստանի նախկին իշխանությունների վարած քաղաքականությունը հանգեցրեց նրան, որ բնակչությունը ցրվեց ողջ աշխարհով՝ լավ կյանքի փնտրտուքներով: Եվ նրանք, ովքեր մնացել են Հայաստանում, կորցրել են իշխանության նկատմամբ հույսը»,- Trend-ը մեջբերում է նրա խոսքը:

Արտահերթ խորհրդարանական ընտրություններին մասնակցում էր 11 քաղաքական ուժ՝ «Իմ քայլը» դաշինքը, «Բարգավաճ Հայաստան» կուսակցությունը, ՀՅԴ-ն, «Լուսավոր Հայաստան» կուսակցությունը, ՀՀԿ-ն, «Մենք» դաշինքը, «Ազգային առաջընթաց» կուսակցությունը, «Քրիստոնյա-ժողովրդական վերածնունդ» կուսակցությունը, «Սասնա ծռեր» կուսակցությունը, «Օրինաց երկիր» կուսակցությունը, «Քաղաքացու որոշում» սոցիալ-դեմոկրատական կուսակցությունը:

Zham.am