Հետհեղափոխական Հայաստանի ապագան. Քոչարյանի կալանավորում և Մարտի 1. ինչի մասին են խոսել բարձրաստիճան պաշտոնյաներն քվեարկությունից հետո (Տեսանյութ)

Այսօր՝ դեկտեմբերի 9-ին¸ արտահերթ խորհրդարանական ընտրություններին քվեարկելու էին եկել նաև առաջադրված քաղաքական ուժերի համամասնական ցուցակների առաջին համարները¸ ինչպես նաև երկրի բարձրաստիճան պաշտոնյաներ: Լրագրողների կողմից հնչեցված հիմնական հարցերն էին ակընկալիքները այս ընտրություններից և ՀՀ երկրորդ նախագահ Ռոբերտ Քոչարյանի կալանքը:

«Իմ քայլը» դաշինքի համամասնական ցուցակը գլխավորող Նիկոլ Փաշինյանը քվեարկությունից հետո լրագրողների հետ զրույցում անդրադարձավ նրա և ԱԱԾ տնօրեն Արթուր Վանեցյանի հեռախոսազրույցի գաղտնալսմանը:

«Ես Ձեզ ասում եմ՝ դատական համակարգին երբեք ոչ մի ցուցում չի տրվել, այդ թվում՝ Քոչարյանի դատավարության գործով։ Հեռախոսազրույցների դրանք ապացուցող մասերը կտրված, մոնտաժված են։ Ես հավատացնում եմ՝ Հայաստանի դատական համակարգը երբեք այսքան անկախ չի եղել», - ասաց նա:

ՀՅԴ համապետական ցուցակը գլխավորող Արմեն Ռուստամյանը՝ քվեարկությունից հետո նշեց, որ ՀՅԴ-ն ուշի ուշով հետևելու է գործընթացներին, որից հետո միայն գնահատական կտա:

«Այս դատավարությունն այնքան մեծ հնչեղություն ունի, որ ամեն ինչ պետք է շատ բծախնդրորեն կատարվի՝ պահելով օրենքի տառն ու ոգին, դա մեր դատական համակարգի ամենամեծ քննությունն է լինելու»,- ընդգծել է նա:

«Բարգավաճ Հայաստան» կուսակցության նախագահ Գագիկ Ծառուկյանի խոսքով՝ Երկրորդ նախագահ Ռոբերտ Քոչարյանի կալանավորման վերաբերյալ որևէ մեկը չի կարող կարծիք հայտնել, քանի այդ հարցը գտնվում է իրավական դաշտում։

Ազգային անվտանգության ծառայության տնօրեն Արթուր Վանեցյանը այսօր քվեարկել է հանուն ազատ և անկախ Հայաստանի, որտեղ քաղաքացին է որոշելու՝ ով է լինելու իր իշխանությունը:

Հարցին, թե տեղյակ է՝ ով է երկրորդ գաղտնալսման հեղինակը, Վանեցյանն ասաց, որ այն, ինչ ասել է գաղտնալսման ժամանակ, բոլորը լսել են, իսկ ձայնագրությունը մասամբ մոնտաժված է, մոնտաժված է այնքանով, որ այն մասերը, որոնք ձեռնտու չեն գաղտնալսողներին, հանված են:

Քվեարկությունից հետո Հանրապետության նախագահ Արմեն Սարգսյանը լրագրողների հետ զրույցում նա շնորհավորել է հայ ժողովրդին ընտրությունների օրվա առթիվ՝ կոչ անելով անպայման գնալ ընտրատեղամասեր և մասնակցել ընտրությանը:

«Քանի որ ընտրությունը մեր ժողովրդի կարևորագույն իրավունքն է, հետևաբար սա տոն է, իսկ տոնը մեր ժողովուրդը պետք է նշի՝ գնալով ընտրատեղամաս և կատարելով ազատ և անկաշկանդ ընտրություն: Սա ապագայի ընտրություն է, քանի որ յուրաքանչյուրը պետք է մտածի իր ընտանիքի, երեխաների և այն պատասխանատվության մասին, որն ինքը կրում է: Սա քաղաքացու պատասխանատվությունը ցուցաբերելու պահն է», - ասաց նա:

ՀՀ երրորդ նախագահ Սերժ Սարգսյանը նույնպես կատարեց իր քաղաքացիական պարտքը: Նա ընտրության է գնացել Կոտայքի մարզի Ձորաղբյուր համայնքում տեղակայված ընտրատեղամասում, սակայն հրաժարվել է պատասխանել լրագրողների հարցերին:

Zham.am