Ստամբուլում սաուդցի լրագրողի սպանության մասին տեղեկություններ են փոխանցվել ԱՄՆ կոնգրեսականներին
Թուրքիայի հետախուզական ծառայության պետ Հաքան Ֆիդանը հանդիպում է ունեցել ԱՄՆ Կոնգրեսի ներկայացուցիչների հետ ու նրանց փոխանցել Ստամբուլում Սաուդյան Արաբիայի հյուպատոսությունում սպանված սաուդցի ընդդիմադիր լրագրող Ջամալ Խաշոգջիի գործի մի շարք մանրամասներ:
Ինչպես գրում է «ՀաբերԹյուրք»-ը, հանդիպումն անցկացվել է փակ դռների հետևում, Ֆիդանի հետ հանդիպած կոնգրեսականների հստակ անունները հայտնի չեն:
Չի բացառվում, որ Ֆիդանի հանդիպումը նախաձեռնվել է որպես փոխադարձ այց՝ ԱՄՆ կենտրոնական հետախուզական վարչության ղեկավար Ջինա Հասփելի Անկարա կատարած այցից հետո:
Նշենք, որ Թուրքիայի հետախուզական ծառայությունը Ֆիդանի տվյալ հանդիպման մասին պաշտոնական տեղեկատվություն չի տարածել:
Հայտնի է, որ լրագրողը հոկտեմբերի 2-ին մտել է Ստամբուլում Սաուդյան Արաբիայի հյուպատոսարան ու այլևս այնտեղից դուրս չի եկել: Ավելի ուշ հայտնաբերված ապացույցների համաձայն՝ Խաշոգջիին սպանել են, հետո մասնատել: Նրա դին առ այսօր չի հայտնաբերվել:
Հետևեք մեզ Facebook-ում