24-ամյա երիտասարդը գնելու պատրվակով վերցրել ու դիմել է փախուստի

Երևանում քրեական գործեր են հարուցվել փողոցում բջջային հեռախոսներ գողանալու դեպքի առթիվ։

ՀՀ ոստիկանության մամուլի ծառայության հաղորդմամբ, նոյեմբերի 26-ին ժամը 22.00-ին Հալաբյան փողոցի մի բնակիչ ոստիկանության Մաշտոցի բաժնում հաղորդում է տվել, որ նույն օրը, ժամը 21.10-ին, Մազմանյան 22/1 շենքի բակում, Հրանտ ներկայացած անձը զննելու և գնելու պատրվակով խաբեությամբ իրենից վերցրել է iPhone 8 տեսակի բջջային հեռախոսը և դիմել փախուստի։ Քաղաքացուն պատճառվել էր 290.000 դրամի վնաս:

Բջջայինի բացահայտ հափշտակության մի դեպք էլ գրանցվել էր դեկտեմբերի 1-ին։ Ժամը 21.00-ին, կենցաղային տեխնիկայի խանութում աշխատող մի քաղաքացի հաղորդում էր տվել, որ նույն օրը ժամը 17.00-ին, Նազարբեկյան 5 շենքի բակում, Հրաչ ներկայացած անձը իր աշխատած խանութից հեռախոս գնելու պատրվակով, խաբեությամբ իրենից վերցրել է iPhone տեսակի բջջային հեռախոս և դիմել փախուստի։ Քաղաքացուն պատճառված վնասը 839.000 դրամ էր:

«Հանցագործությունները կատարած անձին հայտնաբերելու ուղղությամբ ոստիկանության Մաշտոցի բաժնի քրեական հետախույզների ձեռնարկած միջոցառումներով, օպերատիվ տեղեկություններ ստացվեցին, որ կողոպուտները հնարավոր է կատարած լինի Խաչաղբյուր գյուղում հաշվառված, 24-ամյա Հրանտ Հ․-ն», – նշվում է ոստիկանության հաղորդագրության մեջ։

Դեկտեմբերի 3-ին ժամը 18.50-ին նա հայտնաբերվեց և կողոպուտ կատարելու կասկածանքով բերման ենթարկվեց ոստիկանության բաժին: Հարուցված քրեական գործերի շրջանակում, Հրանտ Հ․-ն ներկայացվել է քննչական բաժին և տվել խոստովանական բացատրություն։ Ձեռնարկվում են միջոցառումներ գողոնը հայտնաբերելու ուղղությամբ: Կատարվում է նախաքննություն: