Աշխարհում առաջին անգամ կինը ծննդաբերել է հանգուցյալից փոխպատվաստված արգանդի շնորհիվ. Լուսանկարներ

Բրազիլիայի հիվանդանոցներից մեկում աննախադեպ դեպք է տեղի ունեցել. առանց արգանդ ծնված կինը ծննդաբերելու հնարավորություն է ստացել հանգուցյալ դոնորից փոխպատվաստված արգանդի շնորհիվ:

Ինչպես նշում է The Guardian-ը, նորածին աղջիկը միանգամայն առողջ է:

Հայտնի է, որ արգանդը փոխպատվաստվել է գլխուղեղային արյունազեղման հետևանքով մահացած 45-ամյա կնոջից, որը նախկինում երեք անգամ ծննդաբերել էր: Օրգանը փոխպատվաստվել է 2016թ.՝ 32-ամյա կնոջ օրգանիզմ:

Տասը ժամ տևած վիրահատությունից յոթ ամիս անց իրականացվել է արտամարմնային բեղմնավորում: Երեխայի ծնվելուց հետո փոխպատվաստված արգանդը հեռացվել է կնոջ մարմնից:

Սան Պաուլուի համալսարանի պրոֆեսոր Դանի Էյզենբերգը նկատել է, որ հանգուցյալ դոնորի հետ գործ ունենալն ավելի «հեշտ» է, քանի որ այդ պարագայում վիրաբույժներն այլևս շտապելու և դոնորի կյանքի համար անհանգստանալու կարիք չունեն:

Նշվում է, որ նախկինում մասնագետները փորձել են հանգուցյալից փոխպատվաստված արգանդի միջոցով կանանց մայրանալու հնարավորություն ընձեռել, սակայն փորձերն ապարդյուն են եղել:

Աղբյուր