Եթե տիկին Սիլվան այդքան պահանջված գործարար է, ինչու՞ նրան չեն հրավիրում վարչապետի հետ գործարարների հավաքին (Տեսանյութ)

Այսօր կրկին ասուլիս էր տալիս արդեն հանրահայտ դարձած գործարար Սիլվա Համբարձումյանը:

Տպավորությունն այնպիսին էր, որ նա լրացուցիչ ասելիք չուներ, պարզապես իր պարտքն էր համարել իր լուման դնել՝ ի օգուտ Փաշինյանի նախընտրական արշավի:

Բանից պարզվում է, որ նախկին ժամանակների աջուձախ կաշառքներ բաժանող գործարարը ուրախ է, որ գալիս են նոր անկաշառ ժամանակներ, և ինքն էլ պատրաստվում է համոզել իր ծանոթ գործարարներին, որ Հայաստան ներդրումներ բերեն: Ավելին, տիկին Սիլվայի համոզմամբ, այդ ներդրումների ծավալը գերազանցելու է 200 մլն դոլարի սահմանը:

Բայց եթե դա ճիշտ է, ապա ինչու՞ այս տիկնոջը չընդգրկեցին «Իմ քայլը» դաշինքի ցուցակի մեջ, ումի՞ց էր նա պակաս:

Դեռ ավելին, նրան ոչ միայն չընդգրկեցին իշխող դաշինքի մեջ, այլև նույն այսօրվա իշխանությունը, տիկնոջ արժանիքները չգնահատելով, չի էլ հրավիրում զանազան գործարարների խմբերի հետ վարչապետի որևէ հանդիպման:

Ինչու՞ են արհամարհում տիկին Սիլվային արդեն նոր իշխանությունները, կհարցնի շարքային ընթերցողը:

Պատասխանը պարզ է, ներկայիս իշխանությունները շատ լավ գիտեն տիկին Սիլվայի իրական արժանիքները: Նրանց չի հետաքրքրում այս կնոջ «ներդրումները», քանզի դրանք բլեֆ խոսակցություններ են: Բայց այս տիկնոջ մեկ այլ «ներդրումները» շատ կարևոր են, խոսքը գնում է այս կամ այն «կարևոր» մարդու վրա գործ տալը, որը կարելի է հիմք սարքել՝ հետագայում «ճիշտ ուղղությամբ» ցուցմունքներ կորզելու համար:

Եվ դրա վառ օրինակն այսօր Սամվել Մայրապետյանի «գործն է», որտեղ մարդուն պահում են ցուցմունքներ կորզելու համար, և դրա մասին վերջերս նույնիսկ խոստովանեց նույն տիկին Սիլվան, նշելով, եթե Մայրապետյանը իր օրինակին դիմեր, հիմա իր պես ազատության մեջ կլիներ:

Սակայն սույն տիկինը, հավանաբար չգիտի, թե ինչ է մարդկային արժանապատվություն հասկացությունը, դրա համար էլ զարմանում է Մայրապետյանի վրա: Այսօրվա գլխավոր հերոսները, իհարկե, սիլվաներն են դարձել, ինչպես 37 թվականներին շատ մատնիչներ իրենց իրական դիմագիծն էին բացահայտում:

Սակայն չարժե մոռանալ, որ այս ամենը շատ երկար չի կարող տևել, բայց ամեն մեկը իր քայլի համար պատասխան է տալու, երբ կգան մեր օրերի «կուսակցության 20-րդ համագումարի» հետբացահայտման ժամանակները:

Դավիթ Մկրտչյան