Ցեխշպրտոցի կամ բա՜րև ԱՆքաղաքական-անգաղափարական ընտրություններ...

Նախընտրական քարոզարշավը մոտենում է կուլմինացիոն կետին: Քաղաքական ուժերին մնացել է ընդամենը 3 օր ընտրողներին համոզելու, որ հենց իրենք են այն ընտրյալներն ու առաքյալները, ովքեր երկիրը պիտի դուրս բերեն ստեղծված ծանր իրավիճակից:

Եթե փորձենք գնահատել ընթացիկ քարոզարշավը, ապա մեկ բան ակհայտ է՝ քաղաքական և գաղափարական պայքարը բացակայում է: Մրցակցությունը, եթե չասենք փողոցային բառապաշարի դաշտում է, ապա գործում է  «ով ավելի ճարտար լեզվով կսևացնի մյուսին» տրամաբանությունը:

Քաղաքական բանավեճը և առողջ քննադատությունը ստորադասվել են փոխադարձ ցեխշպրտոցիին ու վիրավորանքներին:

Անժխտելի է, որ թատերաբեմի հիմնական խաղացողները «Իմ քայլը դաշինք» -ն և ՀՀԿ-ն են: Հատկանշական է նաև, որ մրցակցությունը ևս այս երկու ուժերի մեջ է, մնացած ուժերը պարզապես լուսանցքում են հայտնվել:

Ավագանու ընտրությունների ժամանակ հնչեցված սև-սպիտակներ բաժանումը շարունակում է ակտուալ մնալ նաև այս քարոզարշավին:

Սև հանրապետականի անգամ քարոզչական պաստառն է թեմայի մեջ, մեկ ուժ էլ փորձեց գունային փոփոխություն մտցնել և երևալ որպես կարմիր խաղացող, բայց ցավոք սրտի, տեղավորվեց միայն կարմիր լուսանցքից այն կողմ:

Նախկին իշխանություն ՀՀԿ-ն 8 ամսում հասցրեց մոռանալ իր կառավարման տարիները և այժմ մեղադրանքների իսկական կրակահերթ է անում այսօրվա իշխանության՝ «Իմ քայլի»  դեմ:
Իշխանությունն էլ չի հապաղում պատասխանել՝  իսկ ով է երկիրը այս վիճակին հասցրել: Այսքանը, քաղաքական բանավեճը սրանից այն կողմ չի անցնում:

Իսկ թե ինչ է ուզում և սպասում հասարակությունը, արդեն դժվար է ասել՝  սոված մարդուն գեղեցիկ խոսքով չես կերակրի:

Ակհայտ է նաև, որ ապագա խորհրդարանը ևս հեռու է քաղաքական լինելուց: Քարոզարշավը և նախընտրական ցուցակում ներառված թեկնածուները գալիս են ապացուցելու, որ քաղաքական մտավոր էլիտա կոչվածը Հայաստանի համար շարունակելու է մնալ անիրականալի մի բան:

Ակաթի Վահանյան