Շախմատի Հայաստանի պատանեկան հավաքականն Օլիմպիադայում գրավել է 6-րդ հորիզոնականը

Թուրքիայում ավարտվել է շախմատի մինչև 16 տարեկանների Օլիմպիադան: Հայաստանի պատանեկան հավաքականը, չնայած վերջին երկու տուրում հաղթանակներ է տոնել ԱՄՆ-ի և Ռուսաստանի ուժեղ հավաքականների նկատմամբ, այնուամենայնիվ, իր ակտիվում գրանցել է 12 թիմային միավոր և գրավել միայն 6-րդ հորիզոնականը՝ 3-րդ հորիզոնականը զբաղեցրած Չինասանից հետ մնալով միայն 1 միավորով:

Այս մասին հայտնում է Հայաստանի շախմատային ֆեդերացիայի պաշտոնական կայքը:

Թիմի արդյունքի վրա անկասկած ազդել են 1-ին տուրում Շվեյցարիայից և 6-րդ տուրում Ադրբեջանից կրած պարտությունները:

Նշենք, որ այդ երկու մրցախաղերում 1.5-1.5 հաշիվների ժամանակ մեր թիմի անդամները ամբողջովին հավասար դիրքերում սպառել են պարտիայի համար տրամադրվող ժամանակը և պարտությունններ կրել:

Օլիմպիադայի հաղթող է դարձել Ուզբեկստանի թիմը, որը տարել է 8 թիմային հաղթանակ և կրել միայն 1 պարտություն:

Հնդկաստանի հավաքականը 14 միավորով գրավել է 2-րդ հորիզոնականը, իսկ Չինաստանը 13 միավորով եզրափակել է լավագույն եռյակը: