Ալեն Սիմոնյանը սպառնացել է Էդուարդ Շարմազանովին ու պատասխանել Արմեն Աշոտյանին

Եթե Շարմազանովը վարչապետի մասին խոսելիս շարունակի իր այդ ոճը, անձամբ ինձնից կստանա պատասխան: Ազգային ժողովում լրագրողների հետ ճեպազրույցում հայտարարեց ԱԺ պատգամավոր Ալեն Սիմոնյանը՝ անդրադառնալով Էդուարդ Շարմազանովի հայտարարություններին: Հաղորդում է ArmLur.am:

Հիշեցնենք, ՀՀԿ խոսնակ Էդուարդ Շարմազանովը երեկ հայտարարել է, որ Նիկոլ Փաշինյանը կորցրել է ՀԱՊԿ գլխավոր քարտուղարի պաշտոնը, դրա համար է սկսել ձերբակալությունների հերթական սերիան:

«Ես Էդուարդ Շարմազանովին ուզում եմ ընդամենը մեկ բան հորդորել, որ կոռեկտ մնա: Եթե ինքը շարունակի նույն ոճով, անցնի կոռեկտության սահմանները, համապատասխան պատասխան կստանա անձամբ ինձնից»,- ասաց նա:

Պատգամավորից հետաքրքրվեցինք` ի՞նչ պատասխանի մասին է խոսքը, նա ասաց. «Համապատասխան պատասխան իր ոճաբանությանը: Ես իրեն կոչ եմ անում կոռեկտ մնալ եւ ոճը փոխել ՀՀ վարչապետի մասին խոսելիս»: Լրագրողի հարցին` սա սպառնալի՞ք է Ձեր կողմից Էդուարդ Շարմազանովի հասցեին, նա ասաց` չգիտի, ուղղակի հորդորում է:

Ալեն Սիմոնյանը, խոսելով Արմեն Աշոտյանի այն հայտարարության մասին, որ Արամ Հարությունյանի ձերբակալությունը նախընտրական էժանագին շոու է, ասաց. «Սա չէ, որ պետք է մեզ օգնի շատ ձայն հավաքենք: Ակնհայտ է, որ հերթական անգամ ի ցույց են դնում իրենց վերաբերմունքը: Ես, համենայնդեպս, որպես պատգամավոր, այստեղ եմ եւ պատրաստ եմ իմ պարտականությունը կատարել»,- ասաց նա:

Դիտարկմանը, թե հնարավոր չէ՞ր սպասել, քանի որ մի շաբաթից այս խորհրդարանի աշխատանքները վերջանում են եւ մյուս խորհրդարանի աշխատանքները սկսելուց հետո Արամ Հարությունյանն այլեւս պատգամավոր չէր լինի, հետեւաբար հարցն ավելի հեշտ կլուծվեր, Սիմոնյանն արձագանքեց. «Այսինքն, արհեստականորեն ինչ-որ բան արվեր, հա՞: Եթե օրենքի բնականոն գործընթաց է, դա պետք է արվի: Ի վերջո, վարչապետն ամիսներ առաջ ամբիոնից հնչեցրել էր, որ պատգամավորի հետ կապված նման իրավիճակ ենք ունենալու»:

ArmLur.am