Որոշ քաղաքական ուժերի ներկայացուցիչներ շարժվում են դեպի պետական դավաճանություն ու նրանցով պետք է զբաղվի ԱԱԾ-ն և Ռազմական հակահետախուզությունը. Նիկոլ Փաշինյան

«Իմ քայլը» դաշինքի առաջնորդ Նիկոլ Փաշինյանը երեկ Գորիսում նախընտրական քարոզարշավում բնակչության հետ հանդիպման ժամանակ մի ուշագրավ հայտարարություն է արել՝ անդրադառնալով արցախյան հիմնախնդրի հարցում իր ղեկավարած կառավարության քաղաքականության քննադատություններին:

«Հայաստանում կան քաղաքական ուժերի ներկայացուցիչներ, ովքեր օրումեջ հայտարարում են, թե մեր կառավարությունը դավադրություն է պատրաստում Արցախի դեմ և մեր կառավարությունը նենգ մտադրություններ ունի Արցախի դեմ: Անկեղծ ասած, ես անընդհատ մտածում եմ, թե ինչը կարող է դրդել այդ մարդկանց անել հայտարարություններ, որոնց սուտ լինելու մասին գիտեն իրենք: Պատկերացնում եք՝ երբ մարդիկ սուտ հայտարարություններ են անում՝ իրենք էլ իմանալով, որ սուտ հայտարարություն են անում», -Գորիսում հայտարարեց Փաշինյանը:

Նա նաև անդրադարձավ ՀՅԴ Բյուրոյի ներկայացուցիչ Հրանտ Մարգարյանի հայտարարությանը, որի համաձայն, Հայաստանը վերջին ամիսների ըթնացքում որևէ սպառազինություն ձեռք չի բերել:

«Դրանք, սուտ, սխալ հայտարարություններ են: Ու ես անընդհատ մտածում եմ՝ լավ, էս մարդիկ նման հայտարարություններ ինչու են անում», -հավելեց Փաշինյանը՝ ընդգծելով, որ իր մտորումների արդյունքում որևէ տրամաբանական բացատրություն չի գտնում այդ հարցին:

Այդուհանդերձ, նա ասաց, որ մի բացատրություն այդ հարցին ունի. «Որոշ քաղաքական ուժեր հասկացել են իրենց քաղաքական մահվան արձանագրումը և խնդրում եմ, շատ ուշադիր, ժողովուրդ, սա շատ կարևոր բան է, չէի ուզում ասել, բայց պետք է ասեմ՝ իրենց պոտենցիալ, մոտալուտ քաղաքական մահը զգալով, նրանք որոշել են քաղաքական սադրիչ հայտարարություններով դավադիր պատերազմի հրձիգ դառնալ՝ հույս ունենալով, որ կկարողանան հրահրել դավադիր պատերազմ և այդ համատեքստում լուծել իրենց նեղ խմբային, անձնային շահերը:

Սա շատ լուրջ վարկած է, որովհետևր ես իրոք, չեմ կարողանում ուրիշ բացատրություն գտնել: Ես կարծում եմ, որ այս ամենը դուրս է միայն զուտ քաղաքական հարթակներում քննարկելու տրամաբանությունից: Ես կարծում եմ, որ իմ ասած վարկածի ստուգմամբ և այդ հայտարարություններով այլևս պետք է զբաղվեն նաև Ազգային անվտանգության ծառայությունը և ռազմական հակահետախուզությունը, որովհետև ոմանք, որոշ մարդիկ շատ վստահ քայլերով շարժվում են դեպի պետական դավաճանություն: Ես չեմ վախենում այս հայտարարությունը անել»:

Նա նաև հայտարարեց, որ իր ղեկավարած կառավարությունը ու նաև ժողովուրդը ունեն «բավարար լծակներ, որպեսզի արմատախիլ անեն մեր զինված ուժերի թիկունքում քայքայիչ գործողություններ անելու փորձեր անող որոշ ուժերի»:

«Եթե որևէ մեկը ժողովորդական հեղափոխությանը, այսինքն՝ ժողովրդի կողմից ընտրված կառավարությանը կփորձի կասկածել որևէ հակազգային ու հակապետական դավադրության մեջ, մենք մեզ իրավունք կվերապօահենք այդ մարդկանց կասկածել առնվազն օտարերկրյա գործակալներ լինելու մեջ: Էլ չեմ ասում ավելին», -հավելեց Փաշինյանը:

Վարչապետի պաշտոնակատարը հույս հայտնեց, որ Արցախի ժողովուրդը թույլ չի տա, որ որևէ մեկը մանիպուլյացիաներ անելով փորձի ստեղծել տպավորություն, թե Հայաստանի ու Արցախի միջև կա որևէ հակասություն:

«Մեր ժողովուրդը այսօր միասնական է, առավել քան երբևէ: Մեր ժողովուրդը թույլ չի տա իր նեղ մերկանտիլ շահերի համար խաթարել համազգային միասնությունը», նշեց Փաշինյանը: