Խորհրդարանն՝ առանց նրանց. ԲՀԿ-ից ով չի լինի նորընտիր ԱԺ-ում

Zham.am-ը նախորդ հրապարակմամբ ներկայացրեց, թե ՀՀԿ խմբակցության որ պատգամավորներն այլևս չեն լինի ապագա խորհրդարանում:
Այս հրապարակմամբ  անդրադառնում ենք «Ծառուկյան»  ֆրակցիային:

ԲՀԿ  176 հոգանոց նախընտրական ցուցակում 31 հոգանոց  «Ծառուկյան» ֆրակցիայից 18 պատգամավորի բախտն է բերել, իսկ 12 պատգամավոր այլևս չի լինի ապագա խորհրդարանում: Իհարկե, այդ 19 պատգամավորի դեպքում ևս վստահաբար չենք կարող ասել, որ նրանք կանցնեն 7-րդ  գումարման խորհրդարան, քանի որ նրանց մի մասը առաջադրված է ռեյտինգային ընտրակարգով, և քիչ ձայների դեպքում նրանք չեն ստանա բաղձալի պատգամավորական մանդատը:
Այսպես, որ պատգամավորներին  չենք տեսնի ապագա խորհրդարանում…

Գագիկ Ծառուկյանի դստեր ամուսինը՝  Արգամ Աբրահամյանը, ով նախկին վարչապետ Հովիկ Աբրահամյանի որդին է, ներառված չէ նախընտրական ցուցակում:

Վերահսկիչ պալատի նախկին նախագահ Իշխան Զաքարյանը ևս խորհրդարանում չի լինի, չնայած վերջինս խոհրդարանում այնքան պասիվ էր, որ նրա բացակայությունը դժվար թե նկատելի լինի:

Հրանտ Դավթյանը, ով խորհրդարան էր անցել պատգամավոր Մերուժան Սիմոնյանի կողմից մանդատը վայր դնելու շնորհիվ, նույնպես չի լինի ապագա խորհրդարանում: Հիշեցնենք, որ ինչպես շրջանառվում է, Հրանտ Դավթյանն էջմիածինցի հեղինակություն Արթուր Ասատրյանի՝ Դոն Պիպոյի մտերիմն է և ըստ լուրերի՝ հենց Դոն Պիպոն էր միջնորդել Դավթյանի պատգամավոր դառնալու համար:

Գործարար պատգամավոր Մելիք Մանուկյանը՝  Շշերի Մելոն, ով 6-րդ գումարման խորհրդարանում հանդես չի եկել ոչ մի հարցով, ելույթով և օրենսդրական նախաձեռնությամբ, նույնպես ներառված չէ նախընտրական ցուցակում:

Նախկին պատգամավոր Աբրահամ Մանուկյանի որդին՝  Արթուր Մանուկյանը, ևս չի լինի ապագա խորհրդարանում, ցուցակում ներառվելուց օրերի անց նա  ինքնաբացարկի դիմում էր ներկայացրել:
Կենտրոն համայնքի նախկին թաղապետ, ՀՀՇ կուսակցության նախագահ Արարատ Զուրաբյանին ևս չենք տեսնի նոր խորհրդարանում:

6-րդ գումարման խորհրդարանում չեն լինի նաև՝ 

Վահան Կարապետյանը,
Նապոլեոն Ազիզյանը,
Մարինա Մարգարյանը,
Տատյանա Միքայելյանը,
Լուիզա Սարգսյանը,
Այծեմնիկ Օհանյանը: 

Պատրաստեց Ակաթի Վահանյանը