Արցախը և Հայաստանը անձերի հարաբերություններ չեն, դա մեկ ազգի պատմություն է, որը չպիտի խառնել քաղաքականությանը

Ոչ մեկի համար էլ գաղտնիք չի, որ տարիներ շարունակ Հայաստան-Արցախ հարաբերությունները եղել են այնպես,որ երկու պետությունների ղեկավարներն էլ ժամանակ առ ժամանակ միջամտել են միմյանց գործերին, եթե դրա կարիքը եղել է: Ժամանակ առ ժամանակ խորհուրդներով կամ հարցերի լուծման տարբեր եղանակներով ազդեցություն եղել է, թե Արցախի և թե Հայաստանի կողմից: Եթե մեկը հակառակում կփորձի ձեզ համոզել, ապա վստահ կարող եք ասել, որ նա խափում է:

Սակայն, Հայաստանում տեղի ունեցող հեղափոխության ընթացքը երևի առաջինն էր ամբողջ պատմության մեջ, որ Արցախի իշխանության կողմից չեղավ որևէ աջակցություն Հայաստանի, այդ ժամանակ դեռ գործող իշխանությանը: Դրա մասին նույնիսկ հայտարարեց Նիկոլ Փաշինյանը, ով ամբիոնից շնորհակալություն հայտնեց արցախցիներին և անձամբ Բակո Սահակյանը, որ նա որևէ կերպ չի փորձել ազդել ժողովրդի բողոքի ցույցերի վրա:

Այս ամենը հաշվի առնելով մենք պետք է հասկանանք, որ գոնե մինչև հիմա Բակո Սահակյանի և Նիկոլ Փաշինյանի հարաբերությունները լարված չեն: Ու իրականում դրա իմաստն էլ չկա: Ու հետագայում որպեսզի խուսափենք երրորդ ուժի կողմից այս ամենը սխալ ներկայացնելու փորձերից, ապա երկու կողմերն էլ, պետք է փորձեն որքան հնարավոր է քիչ շոշափեն Արցախի վիճակին վերաբերվող հարցերը: Քանի որ ցանկացած հայտարարություն, նույնիսկ ամենաանվնասը, իրենից ենթադրում է, որ հակառակ կողմից պետք է լինի պատասխան: Իսկ այդ պատասխանների արդյունքը մենք արդեն տեսանք, երբ վարչապետի պաշտոնակատարին պատասխանում է նախագահի խոսնակը , հետո էլի նույն վիճակը և այլն:

Արցախը և Հայաստանը անձերի հարաբերություններ չեն, դա մեկ ազգի պատմություն է, որը չպիտի խառնել քաղաքականությանը ու փորձել դրա վրա քաղաքական հիմքեր գցել:

Աշոտ Ասատրյանի ֆեյսբուքյան էջից