Դա իրականությանը չի համապատասխանում. Արցախի ՊԲ հրամանատարը՝ զինվորներին ուղղորդելու մասին
Այսօր մամուլում տեղեկություն է տարածվել, որ Արցախում իրենց ծառայությունն իրականացնող զինծառայողները զանգահարում են ծնողներին՝ տեղեկացնելով, որ դեկտեմբերի 9-ի ընտրություններին մասնակցելու նպատակով իրենց տեղափոխելու են Գորիս եւ Կապան, որտեղ կարող են հանդիպել նաեւ իրենց ծնողների եւ հարազատների հետ:
Նշվում է, որ զինվորները ծնողներին ասել են, թե դա կազմակերպում է ՀՀ վարչապետ Նիկոլ Փաշինյանը՝ պայմանով, որ զինվորները կընտրեն «Իմ քայլը» դաշինքին:
«Դա իրականությանը չի համապատասխանում»,- այս մասին ՀԺ-ի հետ զրույցում ասաց Արցախի Հանրապետության պաշտպանության բանակի հրամանատար, գեներալ-լեյտենանտ Լեւոն Մնացականյանը:
- Պարոն Մնացականյան, մամուլում տեղեկություն է տարածվել, որ դեկտեմբերի 9-ին սպասվող խորհրդարանական ընտրությունների ժամանակ զինվորներն ուղղորդվում են՝ ընտրել «Իմ Քայլը» դաշինքին, ինչպե՞ս կմեկնաբանեք սա:
- Այդպիսի բան չկա, այդ ամենն ապատեղեկատվություն է, քիչ հետո հերքումը կլինի: Դա իրականությանը չի համապատասխանում:
- Իսկ զինծառայողները հնարավորություն ունենալո՞ւ են իրենց հարազատներին տեսնելու:
- Դե, գնալու են ընտրատեղամաս, այդտեղ ազատ են: Եթե ծնողը գա՝ իրենց իրավունքն է, տեսնելու են:
- Ընտրությունն ազա՞տ է զինծառայողների համար, ով ում ցանկանա կարո՞ղ է ընտրել:
- Ով ում ուզի՝ կարող է ընտրել: Բա էլ ուրիշ ինչպե՞ս կարող է լինել: