8 օր ավելի Արցախում մնալու համար քաղաքացուն մուտքի արգելանք է դրվել, տուգանք նշանակվել. բաց նամակ Փաշինյանին

ՀՀ վարչապետի պաշտոնակատար Նիկոլ Փաշինյանին բաց նամակ է գրել Արցախի մի բնակիչ: Այն ներկայացնում ենք ստորև.

«Հարգելի պարոʹն Փաշինյան

Ես ծագումով Արցախից եմ, Ասկերանի շրջանի Խնապատ գյուղից, բայց հանգամանքների բերումով, ինչպես շատ հայեր, դարձել եմ Ռուսաստանի քաղաքացի: Ամեն տարի մեկնում եմ Ղարաբաղ՝ հայրական տուն, որտեղ ունեմ հորիցս ժառանգված սեփականություն: Ս.Թ. ապրիլի 16-ից ես դարձյալ հարազատ օջախում էի՝ Խնապատ գյուղում, որտեղ հիվանդության պատճառով մնացի սովորականից շատ ավելի՝ մինչև հոկտեմբերի 23-ը: Հիվանդությունն այնպիսին էր, որ ես Ռուսաստան մեկնեցի արդեն եղբորս ուղեկցությամբ: Սահմանին՝ Բագրատաշենի անցակետում, պարզվեց, որ ես խախտել եմ սահմանված կարգը և Հայաստանի Հանրապետությունում 180 օրվա փոխարեն մնացել 188 օր, որն էլ հիմք դարձավ, որ իմ նկատմամբ դրվի Ռուսաստանից Արցախ մեկնելու արգելանք, այլապես պետք է վճարվի 50.000 դրամ՝ որպես տուգանք ՀՀ-ում 180 օրից ավելի գտնվելու համար:

Արդյո՞ք սա անհեթեթություն չէ պարոն Փաշինյան: Երբ տուգանք կամ արգելանք է սահմանվում Ռուսաստանի այն բնակիչների նկատմամբ, որոնք ծագումով գոնե Ռուսաստանից չեն, որի մասին կա նույնիսկ նշում ռուսական անձնագրերում:

Ես երբևէ Ղարաբաղը չեմ առանձնացրել Մայր հայրենիքից՝ այն համարելով Հայաստանի Հանրապետության անբաժան մասը: Բայց ներկա պահին, ուզենք-չուզենք, որը նաև ընդունվում է Ձեր կողմից, Արցախը հանդիսանում է որպես առանձին հանրապետություն: Ես չեմ մեկնել Հայաստանի Հանրապետություն և այնտեղ նույնիսկ մեկ րոպե չեմ հանգրվանել, որ իմ նակատմամբ արգելքներ դրվեն: Անմիջականորեն մեկնել եմ Ղարաբաղ, իմ ծննդավայրը, ընդամենը հատելով ՀՀ-ի պետական սահմանը և հարազատ գյուղից զատ այլ վայր չեմ մեկնել, որի մասին կան ապացույցներ՝ ներառյալ մուտքը Արցախ և գյուղական համայնքի տեղեկանք-վկայությունը: Այլ երկրներում ապրող ծագումով արցախցիների նկատմամբ Արցախում նման արգելք կամ սահմանափակում չկա և ես չեմ խախտել այն երկրի օրենքը, որտեղ մեկնել եմ:

Նկատի ունենալով վերոհիշյալը, հարգելի պարոն Փաշինյան, խնդրում եմ Ձեր հանձնարարությունը՝ չեղյալ համարելու արգելանքն իմ նկատմամբ և հնարավորություն տալու Հայաստանի Հանրապետության տարածքով անարգել մուտք գործելու Արցախի Հանրապետություն:

Սարմեն Ազիզբեկի Հակոբյան

Ասկերանի շրջանի Խնապատ գյուղի նախկին բնակիչ, ներկայումս Ռուսաստանի դաշնության Ստավրոպոլի երկրամասի քաղաքացի»: