Արարատ Միրզոյանը Մինսկում Լուկաշենկոյի հետ խոսել է ՀԱՊԿ գլխավոր քարտուղարի հարցի շուրջ (տեսանյութ)

Այսօր լրագրողների հետ զրույցում առաջին փոխվարչապետի պաշտոնակատար Արարատ Միրզոյանը ասաց, որ Մինսկում հանդիպում է ունեցել նաև Բելառուսի նախագահ Ալեքսանդր Լուկաշենկոյի հետ: «Խոսել ենք, այո՛, խոսել ենք։ Խնդրին առնչվող բոլոր նրբերանգների, բոլոր ենթահարցերի վերաբերյալ խոսել ենք։ Բայց ձեր թույլտվությամբ մանրամասներ չեմ հաղորդի»,-ասաց նա, մեկնաբանելով Մինսկում Բելառուսի նախագահի հետ զրույցը ՀԱՊԿ քարտուղարի նշանակման թեմայով:

Միրզոյանը համարում է, որ սա ոչ թե հակասություն է, այլ խնդիր, և դա նորմալ է։ Մինսկում այդ հարցը չի լուծվել, քանի որ դա այլ ձևաչափ էր ու ընդհանրապես ոչ թե ՀԱՊԿ, այլ ԵԱՏՄ շրջանակներում անցկացվող հանդիպում էր, սակայն լուծումը կարող է լինել առաջիկայում։

«Շուտով կկայանա ՀԱՊԿ-ի հերթական հավաքը, և էն ժամանակ գուցե հարցը լուծում ստանա։ Բայց ես ուզում եմ նորից ընդգծել, որ քննարկումը, որին ես եմ մասնակցել, իսկապես շատ կառուցողական էր»,-ասաց Միրզոյանը։