Մոտ 7 մլն դրամ և պաշտոնապես ընդամենը 1 գրասենյակ. ՔՊ-ն ներկայացրել է հայտարարագիրը

«Իմ քայլը» դաշինքը Կենտրոնական ընտրական հանձնաժողով է ներկայացրել դաշինքի մաս կազմող «Քաղաքացիական պայմանագիր» կուսակցության գույքի և դրամական միջոցների մեկ տարվա հայտարարագիրը:

Հաշվետու ժամանակահատվածը 2017 թվականի օգոստոսի 1-ից մինչև 2018 թվականի օգոստոսի 1-ն է: Իշխանական կուսակցության միջոցները, պարզվում է, շատ համեստ են: Հայտարարագրում գրանցված են միայն եկամուտներ, դրամական միջոցներ և 1 անշարժ գույք: Շարժական գույք գրանցված չէ:

Ամեն դեպքում, տարակուսելի է 1 գրասենյակի հայտարարագրումը, քանի որ ՔՊ-ն տարածքային գրասենյակներ ունի և Երևանում և հանրապետության տարբեր մարզերում՝ անկախ նրանից, թե այդ գրասենյակների տարածքներն ինչ հիմունքներով է տնօրինում՝ սեփականության իրավունքով, թե վարձակալան հիմունքներով:

Այսպիսով, վերոնշյալ  ժամանակահատվածում  «Քաղաքացիական պայմանագիրը» ունեցել է 1 մլն 382 022 դրամ դրամական միջոց:

Եկամուտները կազմել են 6 մլն 889 322 դրամ, որը գոյացել է հետևյալ միջոցներից`

4 մլն 857 100 դրամ` ՀՀ պետյուջեից ֆինանսավորում,

2 մլն 32 222 դրամ` կուսակցական անդամավճարներ և նվիրատվություններ:

Կուսակցությունը գրանցել է 1 անշարժ գույք, որը տնօրինում է վարձակալական հիմունքներով:
Անշարժ գույքը կուսակցության 94,8 քառ. մ տարածք զբաղեցնող գրասենյակն է, որը գտնվում է Եզնիկ Կողբացի 2 ա հասցեում:

Zham.am