Վրաստանի այսօրվա ընտրություններում կարող է արձանագրվել սենսացիա. Տեսանյութ

Ինչպես հայտնի է, այսօր Վրաստանում անցկացվում է այդ երկրի նախագահական ընտրությունների երկրորդ փուլը:

Առաջին փուլում չնչին առավելությամբ հաղթանակ էր տարել իշխանության ներկայացուցիչ տիկին Սալոմե Զուրաբիշվիլին: Երկրորդ տեղում էր ընդիմության ներկայացուցիչ Գրիգոլ Վարշաձեն: Վերջինս համարվում է Սաակաշվիլու կողմնակից:

Ընտրությունների առաջին փուլի ընթացքում ոչ ոք չէր կարողացել հավաքել ձայների ավելի քան 50 տոկոսը՝ միանգամից իր հաղթանակը գրանցելու համար:

Սակայն ինտրիգը կայանում է նրանում, որ ընտրություններում երրորդ տեղը գրաված, նույնպես ընդիմության ներկայացուցիչ Բաքրաձեն արդեն հայտարարել է, որ երկրորդ փուլում աջակցելու է Վարշաձեին: Իսկ դա նշանակում է, որ ընտրությունների երկրորդ փուլում Վարշաձեն ստանում է մեծ առավելություն, և շատ դիտորդների կարծիքով նրա հաղթանակը ամենահավանականն է:

Նախօրեին, ճիշտ է, երկրի վարչապետը մի շարք պոպուլիստական որոշումներ է ընդունել ի օգուտ հանրության անապահով խավի, սակայն հարցումները ցույց են տալիս, որ այնուամենայնիվ Վարշաձեի հաղթելու շանսերը  ավելի մեծ են:

Եթե այսօր Վարշաձեն հաղթանակ տանի, ապա կարելի կլինի արձանագրել, որ այդ երկրում կառաջանա փաստացի քաղաքական ճգնաժամ:
Քանզի սահմանափակ լիազորություններ ունեցող, սակայն ընդդիմադիր նախագահը կարող է նոր քաղաքական զարգացումների սկզբնաղբյուր դառնալ, որն էլ իր հերթին կարող է հանգեցնել արտահերթ խորհրդարանական ընտրությունների անցկացմանը:

Իսկ թե ինչ հետևանքներ կարող են ունենալ այդ զարգացումները Հայաստանի համար, կներկայացնենք մեր հաջորդ վերլուծություններում:

Արտակ Հակոբյան