Կոպեկ-կոպեկ հետ կբերենք բանակից թալանված փողերը. Նիկոլ Փաշինյան
Բանակում տեղի ունեցած չարաշահումների վերաբերյալ Ազգային անվտանգության ծառայությունում շատ մեծ քրեական գործ կար հարուցված: Այս մասին այսօր Ստեփանավանում նախընտրական հանդիպման ժամանակ հայտարարեց վարչապետի պաշտոնակատար Նիկոլ Փաշինյանը:
«Պետք է պարզել, թե ովքեր են մատակարարել բանակի սնունդը և ինչ գներով, այն սնունդը, որը Մանվել Գրիգորյանի արջերն էլ էին ուտում ու ժոկ ընկնում: Իհարկե, մատակարարել են ոչ պատահական անձինք: Եվ հիմա, երբ ոմանք այսօր հիստերիա են բարձրացնում, ես դա կապում եմ դրա հետ, որովհետև ես շատ հստակ ասել եմ, որ բանակի մատակարարման հին մեխանզիմները թույլ չեմ տալու, որ գործեն: Մեկ զգուշացրեցի՝ որակի հարցերը լուծեք, երկու զգուշացրեցի, երեք զգուշացրի, երրորդ անգամից հետո էլ զգուշացնել չկա»,- ասաց Նիկոլ Փաշինյանը:
Փաշինյանի խոսքով՝ կոպեկ-կոպեկ վերադարձնելու են բանակից թալանված գումարները:
«Շատ հստակ ասում եմ՝ մեր առաջնահերթությունը մեր բանակը վերստին տարածաշրջանի ամենամարտունակ բանակ դարձնելն է: Եվ սա մեր կառավարության համար լինելու է բացարձակ առաջնահերթություն: Բայց թող չմտածեն, որ էդ փողերը ով տարել ա, մենք նրանց ասելու ենք՝ ցտեսություն: Ես հիմա շատ ուղիղ ասում եմ՝ պետք ա բերեք վերադարձնեք էդ փողերը: Ժողովրդով կգանք յուրաքանչյուրիդ հետևից ու կոպեկ-կոպեկ կստանանք»,- հայտարարեց Փաշինյանը:
Zham,am