Փաշինյանը՝ ՀԱՊԿ-ի և հայ-ռուսական հարաբերությունների մասին
Հայաստանը պետք է Ռուսաստանի հետ հարաբերությունները նոր մակարդակի հասցնի և՛ ԵԱՏՄ-ի, և՛ ՀԱՊԿ-ի մակարդակով: Այս մասին այսօր Վանաձորում հայտարարել է «Իմ քայլը» դաշինքի ցուցակը գլխավորող Նիկոլ Փաշինյանը:
Անդրադառնալով ՀԱՊԿ-ում ստեղծված իրավիճակին, Նիկոլ Փաշինյանը դիտարկեց. «ՀԱՊԿ-ում բուռն քննարկումներ են տեղի ունենում, որի իմաստը անդամ երկրների դաշնակցային հարաբերությունները հստակեցնելն է: Մեզ համար այնքան էլ ընդունելի չէ և պարզ չէ, թե ինչու են մեր դաշնակիցները զենք վաճառում մեր նկատմամբ թշնամաբար տրամադրված երկրին: Սա լուրջ մարտահրավեր է, և մենք մտադիր ենք մեր գործընկերների հետ այս թեման պարզ, շիտակ քննարկել: Իմանանք՝ ում վրա պիտի հույս դնենք, ում վրա չդնենք»:
Հիշեցնենք, որ Մարտի 1–ի գործով Հայաստանում հարուցված քրեական գործի հետևանքով ՀԱՊԿ գլխավոր քարտուղար Յուրի Խաչատուրովը հեռացվել էր պաշտոնից: Նոր գլխավոր քարտուղարի նշանակման վերաբերյալ որոշումը կայացվելու է դեկտեմբերի 6-ին՝ Սանկտ Պետերբուրգում կայանալիք ՀԱՊԿ գագաթնաժողովի ժամանակ:
Zham.am