Նիկոլը ճիշտ է, «Սասնա Ծռերը»՝ սխալ, բայց... Տեսանյութ

Երեկ, իրենց նախընտրական արշավի առաջին օրը, «Սասնա Ծռերը» հանդես եկան հայտարարությամբ, որի համաձայն, գալիք կազմավորվելիք խորհրդարանը պետք է ժամանակավոր բնույթ ունենա, և 1,5-2 տարի անց մի շարք խնդիրներ լուծելուց հետո, այն պետք է լուծարվի, և նշանակվեն նոր արտահերթ ընտրություններ:

«Ծռերի» այս մեսիջը հունից հանեց Փաշինյանին, և նա կտրուկ արձագանքեց, նշելով, որ իր իշխանությունը Սերժ Սարգսյանի ժամանակվա պես թույլ չի լինելու, որ իր հետ խոսեն կոշտ լեզվով:

Միանգամից նշենք, որ այստեղ Փաշինյանը ճիշտ է: Եթե ամեն մի ուժ որոշի, որ անհրաժեշտ է անցկացնել արտահերթ ընտրություններ, ապա երկրում կառաջանա քաոսային իրավիճակ, և դա ոչ մի լավ բան չի խոստանա երկրին: Մանավանդ, որ գալիք ընտրությունները լեգիտիմ են լինելու, քանզի զերծ են լինելու ընտրակաշառքի և ընտրակեղծիքների կիրառումներից:

Մյուս կողմից, «Ծռերը» հիմնավորում են, թե ինչու են հանդես գալիս նման առաջարկով:
Երեկ Արարատ TV-ում, «Ծռեր»-ի ներկայացուցիչ Վարուժան Ավետիսյանը հանրամատչելի ձևով բացատրեց, թե ինչ ծրագրեր ունեն «Ծռերը» այս 1,5-2 տարիների ընթացքում, և ինչու անհրաժեշտություն կառաջանա երկու տարի անց անցկացնել նոր արտահերթ ընտրություններ:

Ըստ Ավետիսյանի այս երկու տարվա անցումային փուլում պիտի լուծվի մի քանի հիմնական խնդիր:

Առաջին
Պետք է վերամիավորել Արցախը Հայաստանին՝ այն դարձնելով երկրի մարզերից մեկը:

Երկրորդ
Պետք է «անցումային արդարադատության» միջոցով հիմնել «Ազգային նյուրնբերգյան» դատարան, և այս ատյանում դատել «հանցավոր» ռեժիմի բոլոր ներկայացուցիչներին:

Երրորդ
Պետք է հանցավոր հայտարարել ՀՀԿ-ն, ԲՀԿ-ն, ՀՅԴ-ն, ՕԵԿ-ը և մյուս՝ «ռեժիմին» սպասարկող ուժերին: Այդ ուժերի ներկայացուցիչներին պատժել և թույլ չտալ, որ նրանք կամ նրանց ներկայացուցիչները նույնիսկ քողարկված ձևով մասնակցեն ապագա ընտրություններին:

Չորրորդ
Երկու տարվա ընթացքում վերականգնել ռազմական բալանսը Ադրբեջանի հետ, և դուրս բերել Հայաստանը ՀԱՊԿ-ից ու ԵԱՏՄ-ից:

Հինգերորդ
Հանրաքվեի միջոցով ընդունել նոր Սահմանադրություն:

Այս հինգ հիմնական կետերը կատարելուց հետո միայն որոշում կայացնել նոր արտահերթ ընտրությունների անցկացման մասին:

Պետք է նշել, որ այս կետերից նույնիսկ մեկի կատարումից հետո անհրաժեշտ կլինի անցկացնել նոր արտահերթ ընտրություններ:

Արտաքուստ այս կետերը շատ գեղեցիկ տեսք ունեն, հնչուն են և տպավորիչ: Սակայն այս կետերից ցանկացածի տակ թաքնված է Հայաստանը կործանող վտանգավոր ական:

Իսկ թե ինչո՞ւ, մենք մեր հետագա վերլուծություններում մեկ առ մեկ կներկայացնենք, քանզի երկրին սպառանացող վտանգավոր գաղափարները եթե պատասխան վերլուծության չեն արժանանում, ապա նրանք դառնում են հրապուրիչ և չափազանց վտանգավոր:

Այդ իմստով Նիկոլը վերջնարդյունքում «Ծռերի» հետ իր վեճում ճիշտ է, բայց նա դա պետք է կարողանա ապացուցել՝ իր պրակտիկ և ճիշտ քայլերով:
Հակառակ դեպքում, նա այս 1.5-2 տարվա ընթացքում կկորցնի իր վարկանիշը, և կհայտնվի ծանր վիճակում:

Սա է այն մարտահրավերը, որը կանգնած է Նիկոլի առաջ: Բայց այդ մարտահրավերը միայն Նիկոլինը չէ: Դա նաև մեր մարտահրավերն է, իսկ եթե դրա գիտակցության պակասը ակներև լինի, ապա ներկայիս Հայաստանը կունենա այն ճակատագիրը, որն ունեցավ 1920 թվականին: Եվ դրա համար արդեն ոչ բոլշևիկներին պետք է մեղադրել, ոչ էլ՝ թուրքերին, քանզի եթե Ազգը չի ունենում համարժեք լուրջ պատասխանատու վերնախավ, ապա այն իրավունք չի ունենա Ազգ կոչվելու և դառնում է բնակչություն՝ կորցնելով իր պետական ատրիբուտներն ու կենսագործունեության բնական տարածքը:

Սա է իրականությունը:

Արտակ Հակոբյան