Սասուն Միքայելյանի վրիպակը և դրա շուրջ արձագանքը պիտի մտահոգի Փաշինյանին. Տեսանյութ

Միանգամից նշեմ, որ ի տարբերություն շատերի, ես չեմ կարծում, որ Սասունը միտումնավոր է նման արտահայտություն արել՝ կապված արցախյան հաղթանակների և ապրիլյան հեղափոխության համեմատականի հետ:
Պարզապես նախընտրական մթնոլորտում մարդը կարող է և վրիպել:
Սակայն հետաքրքիր է, որ այդ վրիպակը մեծ աղմուկ հանեց, և դա պատահական չի կարելի համարել:
Քննադատելով Սասունին, մարդիկ մտովի քննադատում են, փաստացի, Փաշինյանին: Այսինքն, քննադատության իրական թիրախը Սասունը չէ, այլ՝ Փաշինյանն է, ինչը ցույց է տալիս, թե ինչ մթնոլորտ է ձևավորված այսօր Հայաստանում:
Սակայն դա ոչ թե պետք է նյարդայնացնի Փաշինյանին, այլ՝ մտածելու հիմք տա. ինչո՞ւ են այսքան զայրացած իր դեմ:

Ընդ որում, զայրացած են տարբեր շրջանակներ, տարբեր պատճառներով: Սա վտանգավոր է այն իմաստով, որ եթե դու չես կոնսոլիդացնում վերնախավին քո շուրջ, ապա այդ վերնախավը կկոնսոլիդացվի քո դեմ: Իսկ պատրվակներ շատ կարելի է գտնել:
Ընտրությունների ավարտից հետո Փաշինյանի թիվ մեկ խնդիրը դա պետք է լինի: Առանց հանդարտ մթնոլորտի հաստատման, երկիրը ոչ մի պոզիտիվ ապագա չի կարող ունենալ:
Սա պետք է գիտակցի Փաշինյանը, մանավանդ որ դեկտեմբերի 9 –ից հետո նրա ձեռքում է հայտնվելու ամբողջական իշխանությունը՝ իր բոլոր չլուծված խնդիրներով:

Արտակ Հակոբյան