Ի՞նչ են հուշում հիմնական քաղաքական ուժերի նախընտրական հոլովակները. Տեսանյութ

Եվ այսպես, երեկ, քարոզչական արշավի առաջին օրը, մենք ծանոթացանք նաև քաղաքական ուժերի նախընտրական հոլովակների հետ:
Փորձենք կարճ բնութագրել նրանց արդյունավետությունը՝ ընտրողների տեսանկյունից:

Սկսենք «Իմ քայլը»-ը դաշինքի հոլովակից:

Զարմանալիորեն, այն շատ նման էր նախկինում ՀՀԿ-ի նոմենկլատուրային նախընտրական հոլովակներին: Այնպիսի տպավորություն է, որ իշխանության գալուց հետո, այս դաշինքում բոլորը դարձել են նոմենկլատուրային գործիչներ: Դժվար թե այս տիպի հոլովակներով դաշինքը ավելացնի իր ընտրազանգվածը: Հասկանալի է, որ այս դաշինքն է ընտրությունների ֆավորիտը, սակայն դա չի նշանակում, որ այսքան արագ պիտի փոխվեն իշխանության գալուց հետո՝ պատրաստելով խիստ նոմենկլատուրային հոլովակներ:

ՀՀԿ-ի նախընտրական հոլովակը, ճիշտ հակառակը, տարբերվում էր իր կրեատիվությամբ, և տպավորիչ էր: Կարելի է չսիրել այս ուժին, սակայն չի կարելի չնշել, որ նրանց հոլովակները հետաքրքիր են և ազդեցիկ:

ԲՀԿ-ի նախընտրական հոլովակը կառուցված էր բացառապես Ծառուկյանի անձի գովազդի հիման վրա: Այն կարելի էր ցույց տալ՝ և այսօր, և մեկ տարի առաջ, և հինգ տարի հետո: Հասկանալի է, որ քաղաքական ասելիք այս հոլովակում չկար:

ՀՅԴ-ի նախընտրական հոլովակը խիստ ավանդական բնույթ ուներ:

Իհարկե կա նաև համապատասխան ընտրազանգվածը, բայց պակասում է ժամանակակից փոշին ու կրեատիվ միտքը:

ՕԵԿ-ի նախընտրական հոլովակը հիշեցնում է նեղսրտած մարդու մոնոլոգ, ով վիրավորված է, որ իրեն այդպես էլ չեն հասկանում:
Սակայն նման մոնոլոգներով կարելի է հանդես գալ ընկերական շրջապատում, խմիչքներով լի սեղանի շուրջ, սակայն ոչ՝ հանրության առջև:

«Լուսավոր»-ի նախընտրական հոլովակը դիտելիս թվում է, որ քեզ ուզում են խաբել, քանզի արհեստական պաթոսը չափից դուրս շատ է:

«Սասնա Ծռերի» նախընտրական հոլովակից այն տպավորությունն է, թե տղերքը դուրս են գալիս որսի:

Այս հոլովակը ավելի շատ հիշեցնում էր ռուսական հանրահայտ «Бригада» հեռուստասերիալի հերոսներին:

Լևոն Շիրինյանի կուսակցության նախընտրական հոլովակը այդպես էլ անհասկանալի դարձավ, թե ինչի են ուզում մասնակցել ընտրություններին: Այնպիսի տպավորություն էր, Փաշինյանն է խնդրել Շիրինյանին այս միջոցառմանը մասնակցելու համար: Բայց ինչու՞, այդպես էլ պարզ չէ:

Մյուսների հոլովակները դեռ չկան, բայց այս կարճ ժամանակում շռայլություն չէ՞ ուշանալը: Կարող ենք կանխատեսել, որ ասենք, «Մենք» դաշինքի քարոզչական թիմը ձախողում է այդ ուժի աշխատանքները, քանզի քարոզչական փուլի ավարտվին մնացել է ընդամենը ... 13 օր:

Zham.am