Մարմինը մասնատել են երաժշտության ներքո, հետո տեղափոխել հյուպատոսի տուն. New York Times-ը հրապարակել է Խաշոգջիի սպանության վերաբերյալ լրագրողական հետաքննության արդյունքները (տեսանյութ)

Հեղինակավոր New York Times պարբերականը հրապարակել է սաուդցի ընդդիմադիր լրագրող Ջամալ Խաշոգջիի սկանդալային սպանության վերաբերյալ արված լրագրողական հետաքննության տեսատարբերակը՝ ներկայացնելով մանրակրկիտ հետաքննության ուշագրավ բացահայտումները:

Մոտ ինը րոպե տևողությամբ տեսանյութում ներկայացված է Ստամբուլում Սաուդյան Արաբիայի հյուպատոսարանում կատարված սպանությանը նախորդած, բուն սպանության և դրան հաջորդած դեպքերի ժամանակագրությունը: Տեսանյութը ստեղծվել է թուրքական լրատվամիջոցների հրապարակած տեսանյութերի ու հստակ ապացույցների հիման վրա:

Ընդհանուր առմամբ, լրագրողական հետաքննությունը տևել է մի քանի շաբաթ ու ժամ առ ժամ վերականգնում է սպանության օրվա, դրա նախօրեի ու հանցագործությանը հաջորդած ժամերի իրադարձությունները:

Ցուցադրելով Խաշոգջիի սպանությանը ներգրավված անձանց լուսանկարները՝ հետաքննության հեղինակները նշում են. «Նրանք 15-ն են: Նրանց մեծ մասը Ստամբուլ է ժամանել գիշերը՝ սպասելով թիրախի ժամանմանը: Իսկ թիրախը Ջամալ Խաշոգջին էր՝ Սաուդյան Արաբիայի կառավարության ու երիտասարդ թագաժառանգի՝ Մոհամադ բին Սալմանի ամենահայտնի քննադատներից մեկը, որը թագաժառանգին մեղադրում էր հայրենիքում վախի մթնոլորտ ձևավորելու, սաուդցիներին լռեցնելու համար»:

Տեսանյութում նշվում է, որ լրագրողի սպանության գործը «գլուխ բերելու» համար Սաուդյան Արաբիայում ստեղծվել է «մասնագետների հատուկ թիմ», որոնց անդամներից որոշները կապ ունեն անձամբ գահաժառանգի հետ:

Թիմը բաժանվել է երեք խմբի, որոնք կասկած չառաջացնելու համար Խաշոգջիի սպանությունից ժամեր առաջ Ստամբուլ են ժամանել տարբեր չվերթներով՝ տարբեր քաղաքներից:

Լրագրողները թիմերի մեջ առանձնացնում են 3 հոգուց բաղկացած խումբը: Դրանում ներառվել են դիահերձման մասնագետը, որը մասնատել է այլախոհի դին, Խաշոգջիի «նմանակը», որը սպանությունից հետո հագել է սպանվածի հագուստն ու դուրս եկել հյուպատոսության շենքից՝ տեսահսկման խցիկների առաջ ձևացնելով, թե հենց Խաշոգջին է այնտեղից դուրս գալիս, և ամբողջ գործողության ղեկավարը, որն անմիջական կապի մեջ է արքայազնի հետ, նրան ուղեկցում է բոլոր արտասահմանյան ուղևորությունների ժամանակ: Նրանք բոլորը տեղավորվել են հյուպատոսարանից ոչ հեռու գտնվող տարբեր հյուրանոցներում:

Տեսահսկման խցիկների ֆիքսած կադրերում երևում է, որ Խաշոգջիի սպանությունից երեք ժամ առաջ օպերացիայի ղեկավարը, դիահերձման մասնագետն ու լրագրողի «նմանակը» հետևի մուտքից մտնում են հյուպատոսարան: Դռան մոտ տեղավորվում է մեծ մեքենան, որով ավելի ուշ տեղափոխվում են Խաշոգջիի մասնատված մարմնամասերը:

Այնուհետև հյուպատոսարանի շենքի մոտ են հայտնվում լրագրողն ու նրա նշանածը: Սա վերջին անգամն է, երբ զույգն իրար տեսնում է: Խաշոգջին հեռախոսը տալիս է նշանածին, մտնում շենք, որտեղից նրան վիճակված չէ այլևս դուրս գալ:

Լրագրողին հրավիրում են երկրորդ հարկ՝ հյուպատոսի աշխատասենյակ, մինչդեռ հանցախումբը սպասում է կողքի սենյակում: Հարձակումն իրեն երկար սպասել չի տալիս. րոպեներ անց նա արդեն մահացած էր:

Այնուհետև դիահերձման մասնագետը մասնատում է Խաշոգջիի դին: Հատկանշական է, որ նա դա անում է երաժշտության հնչյունների ներքո: Մինչդեռ օպերացիայի ղեկավարը զանգահարում է իր վերադասին ու ասում. «Ասա ղեկավարին՝ գործն արված է»:

Այդ ընթացքում հետնաբակում սպասող մեքենան տեղափոխում է սպանվածի մարմնի մասերը, իսկ հանցախումբը սկսում է հյուպատոսարանի ներսում վերացնել հանցանքի հետքերը:

Մինչ Խաշոգջիի հարսնացուն նրան սպասում է հյուպատոսրանի շենքի մոտ՝ այնտեղ, որտեղ զույգը բաժանվել էր, նմանակը հագնում է լրագրողի հագուստն ու դուրս գալիս: Դա արվել է այն նպատակով, որ տեսահսկման խցիկները ֆիքսեն «Խաշոգջիի»՝ հյուպատոսության շենքից ողջ-առողջ դուրս գալը: Սակայն փոքրիկ բացթողումը մատնում է դավադիրներին. նմանակը մոռացել է հագնել սպանվածի կոշիկները, և ֆիքսված կադրերում հստակ երևում է, որ նա այն նույն մարզակոշիկներով է, որոնցով սպանությունից առաջ մտել էր հյուպատոսարան:

Ինչ վերաբերում է մարմնի մասերը տեղափոխող մեքենային, ապա այն մի քանի րոպե երթևեկելուց հետո կանգ է առնում հյուպատոսի պաշտոնական կեցավայրի մոտ ու հետո բակ մտնում:

Խաշոգջիի անհետացումից 4 ժամ անց հանցախմբի անդամներից ոմանք գնում են օդանավակայան ու Սաուդյան Արաբիա վերադառնում:

Այս ընթացքում լրագրողի հարսնացուն անհանգիստ նրան է սպասում շենքի մոտ:

Մի քանի օրվա ընթացքում ընդդիմադիր լրագրողի անհետացման պատմությունը մեծ աղմուկ է բարձրացնում ոչ միայն Թուրքիայում, այլև ամբողջ աշխարհում:

Անհետացումից ինն օր անց Սաուդյան Արաբիայից մասնագետների թիմ է ժամանում Ստամբուլ: Սակայն թուրքական մեդիայի պնդմամբ՝ թիմի նպատակը ոչ թե կատարվածի հետաքննումն էր, այլ առկա հետքերի ու ապացույցների կոծկումը:

«Այժմ սաուդցի դատախազները ցանկանում են մահապատժի դատապարտել սպանության գործով կասկածյալներին, որոնց մեջ, սակայն, ներառված չէ թագաժառանգը, որը բազմաթիվ արևմտյան պետությունների համոզմամբ՝ պատվիրել է այս սպանությունը: Խաշոգջիի մնացորդներն առ այսօր չեն հայտնաբերվել»,- եզրափակում են լրագրողները:

Աղբյուրը՝ Tert.am