«Քաղաքացու որոշում» կուսակցությունը քարոզարշավը սկսեց մանդարինով
«Քաղաքացու որոշում» սոցիալ-դեմոկրատական կուսակցությունը քարոզարշավը սկսվեց մանդարինով. սոցիալ-դեմոկրատները քարոզարշավը մեկնարկեցին Երևանի Մաշտոցի պուրակից՝ նախընտրական ծրագրի բուկլետները մանդարինով բաժանելով:
«Հիմնականում շրջիկ քարոզարշավ է լինելու: Մարդկանց բաժանելու ենք մեր խորհրդանիշ մանդարինը, որը սոցիալական արդարության, համերաշխության, հավասարության խորհրդանիշ է: Տալու ենք նաև ծրագրային թռուցիկներ»,-այս մասին հայտարարեց կուսակցության գործադիր մարմնի անդամ Միքայել Նահապետյանը։
«Քաղաքացու որոշում» կուսակցության անդամների խոսքով՝ քարոզարշավին մարտական են տրամադրված, առաջիկա չորս օրերի քարոզչությունը կլինի Երևան քաղաքում:
Անդրադառնալով քարոզարշավը Մաշտոցի պուրակից սկսելու հարցին, Միքայել Նահապետյանը նշեց. «Մաշտոցի պուրակը մի վայր է, որտեղ ձևավորվել են այսօր արդեն ֆորմալ քաղաքական գործընթացներում մասնակցող քաղաքացիական հասարակության ներկայացուցիչները: Այստեղից է մեկնարկել 2012 թվականին հանրային տարածքի համար պայքարը: Հետագայում քաղաքացիական պայքարի այդ նույն սերունդը սկսեց բարձրացնել սոցիալական այլ խնդիրներ՝ տրանսպորտի, էլէկտրաէներգիայի թանկացում, կենսաթոշակային համակարգի դեմ պայքարեց»:
Հետևեք մեզ Facebook-ում