Բաբայանը չի կիսում Սեֆիլյանի կարծիքն Արցախի վերամիավորման և ՌԴ-ի հետ հարաբերությունների հարցում
Այսօր տեղի ունեցած դատական նիստից հետո լրագրողները Արցախի ՊԲ նախկին հրամանատար Սամվել Բաբայանից հետաքրքրվեցին, թե ինչպես է վերաբերվում Արցախում Ժիրայր Սեֆիլյանի ու «Սասնա ծռեր» կուսակցության կողմից գործունեություն սկսելու հանգամանքին:
«Ժիրայր Սեֆիլյանի գործերն ինձ հետ որևիցե կապ չունեն: Ես իմ տեսակետն այդ հարցում շատ հստակ արտահայտել եմ, որ չի կարելի Ղարաբաղում ունենալ իշխանություն, որը Հայաստանի հետ չի աշխատելու, չի համագործակցելու:
Հայաստանի կարծիքը պետք է նկատի ունենալ, միշտ: Ի՞նչ նկատի ուներ Ժիրայր Սեֆիլյանը, ես տեղյակ չեմ: Չեմ կարող ասել՝ ինչի մասին է նա խոսում, քանի որ մենք չենք շփվում: Ես Արցախը Հայաստանին միացնելու հարցն այս փուլում սխալ եմ համարում, ինչպես նաև սխալ եմ համարում Ռուսաստանի հետ հարաբերությունների վերաբերյալ Ժիրայր Սեֆիլյանի և իր թիմի կարծիքը: Ես իմ կարծիքն իրեն ասել եմ, նա գիտի այդ մասին, դրա համար մենք իրար հետ չենք շփվում»,- հայտարարեց Սամվել Բաբայանը:
Zham.am
Հետևեք մեզ Facebook-ում