Թրամպը աշխարհի՞ն է մեղադրել լրագրողի սպանության մեջ

ԱՄՆ նախագահ Դոնալդ Թրամփը ասել է, որ սաուդացի ընդդիմադիր լրագրող Ջամալ Խաշոգջիի սպանության համար մեղավոր է դաժան աշխարհը:

Ինչպես փոխանցում է ТАСС գործակալությունը, նման կարծիք ամերիկացի առաջնորդը հայտնել է Ֆլորիդայի Mar-a-Lago կալվածքում հրավիրված ասուլիսում, որտեղ նա անցկացնում է Գոհաբանության օրը:

Թրամփին հարցրել են, թե ում է պետք պատասխանատվության ենթարկել Խաշոգջիի սպանության համար: «Գուցե պատասխանատվության է պետք ենթարկել աշխարհը, որը դաժան վայր է հանդիսանում: Աշխարհը շատ դաժան վայր է», - պատասխանել է ԱՄՆ ղեկավարը:

Հիշեցնենք, որ երեքշաբթի Թրամփը հայտարարել էր, որ Միացյալ Նահանգները շարունակում է լինել Սաուդյան Արաբիայի հուսալի գործընկերը՝ անկախ Խաշոգջիի սպանության գործում առկա չբացահայտված հանգամանքներից:

Թրամփն ասել էր, որ մտադիր չէ լրագրողի սպանության պատճառով խզել հարաբերությունները Սաուդյան թագավորության հետ:

Հիշեցնենք, որ Միացյալ Նահանգների նախագահ Դոնալդ Թրամփը հայտարարել էր, որ նոյեմբերի 20-ին ծավալուն զեկույց կներկայացվի ընդդիմադիր սաուդացի լրագրող Ջամալ Խաշոգջիի սպանության վերաբերյալ, և որ ամերիկյան կողմը զեկույցում կհայտնի նաև սպանության հրամանը տվողի անունը: