Վահրամ Բաղդասարյանը Սերժ Սարգսյանի կամ Կարեն Կարապետյանի 2018-ին վարչապետ լինելու մասին (տեսանյութ)

Սերժ Սարգսյանն ինքը չի ցանկացել ղեկավարել իշխող Հանրապետականի նախընտրական ցուցակը՝ այդ կերպ փորձելով խուսափել շահարկումներից:

Ինչպես «Ազատության» հետ զրույցում նշեց Հանրապետական խմբակցության ղեկավար Վահրամ Բաղդասարյանը, Սարգսյանն իր այդ որոշման վերաբերյալ համոզիչ բացատրություններ է տվել։

Բաղդասարյան. - Բավականին քննարկման առարկա դարձավ այդ խնդիրը, և շատ համոզիչ պատասխան տվեց հանրապետության նախագահը, որ ի՛ր որոշումն է։ Եթե Դուք հիշում եք, նախորդ ընտրությունների ժամանակ, երբ որ հանրապետության նախագահը կամ ավելի բարձր պաշտոնատար անձ՝ Հանրապետականի առաջնորդը ղեկավարում էր ցուցակը, այն ժամանակ բավականին խոսակցություններ էր գնում, որ, բնականաբար, «ամբողջ պետական ռեսուրսը պետք է աշխատի նախագահի համար կամ Հանրապետական կուսակցության առաջնորդի համար»։ Առաջին պատճառներից մեկը դա էր, որ հանրապետության նախագահը, որպեսզի զերծ մնա նմանատիպ քննադատություններից, ինքը որոշում կայացրեց, որ ինքն ավելի լավ է հետևի բոլոր քաղաքական անցուդարձին և նմանատիպ երևույթներից զերծ մնանք։ Հաջորդը՝ տրվեց այն պատասխանը, որ անընդհատ թմբկահարում էին թերթերը, որ «նա պետք է դառնա վարչապետ, պետք է դառնա Ազգային ժողովի նախագահ», և այս մի քայլով տրվեց երկուսի պատասխանը։ Հայտարարություն արվեց, որ մեր հաղթանակի դեպքում կառավարությունը վարչապետով կշարունակի իր գործունեությունը, և իր անուն ազգանունը տեղ չի գտել այսօր ցուցակում, այսինքն՝ նաև չի կարող լինել նաև Ազգային ժողովի նախագահ։

«Ազատություն». - Բայց իրավական արգելք չկա, որ նա հետագայում լինի վարչապետ։

Բաղդասարյան. - Մենք չենք կարող ցուցակով հայտարարել, պարզապես հայտարարվել է՝ մեր հաղթանակի դեպքում կառավարությունը կշարունակի իր գործունեությունը վարչապետ Կարեն Կարապետյանի գլխավորությամբ։

«Ազատություն». - Բայց Կարեն Կարապետյանը ձեր ցուցակում չընդգրկվեց հենց այն պատճառով, որ նա վերջին չորս տարիների ընթացքում չի բնակվել Հայաստանի Հանրապետությունում։ Այս նույն սահմանափակումը նաև տարածվելու է 2018-ից հետո, որովհետև վարչապետի թեկնածուն, ըստ նոր Սահմանադրության, նույնպես պարտավոր է վերջին չորս տարիներին բնակված լինի Հայաստանում, այսինքն՝ 2018-ից հետո Կարեն Կարապետյանի վարչապետ լինելու հանգամանքը նորից հայտնվելու է հարցականի տակ, և կարող է Սերժ Սարգսյանը նրան հանգիստ փոխարինել։

Բաղդասարյան. - Ինձ թվում է, որ Դուք թվաբանությունից բավականին լավ եք, այնտեղ օրերի քանակ կա, թե ինչքան ժամանակ պետք է բնակված լինի։ Մինչև 2018 թվականը շուրջ երկու տարի ժամանակ ունենք, և եթե այդ թվաբանությունը մենք կատարենք՝ օրենքի կետին և տողին համապատասխան, ինձ թվում է, որ այդ խնդիրն արդեն կարգավորված կլինի, և նման խնդիր մենք չենք ունենա։

«Ազատություն». - Այսինքն՝ Դուք վստա՞հ եք, որ 2018-ին արդեն այդ չորս տարվա ցենզի պահանջը...

Բաղդասարյան. - Վստահ եմ, և ոչ միայն ես, այլև այն մասնագետները, ովքեր այդ հաշվարկները կատարում են։ Ինձ թվում է, որ մենք նման խնդիր չենք ունենա։

«Ազատություն». - Դուք բացառո՞ւմ եք, նաև Սերժ Սարգսյանը բացառո՞ւմ է, որ կլինի վարչապետ 2018 թվականից հետո, երբ որ վայր դնի նախագահի լիազորությունները։

Ամվողջական հարցազույցը՝ «Ազատության» տեսանյութում: