«Կոչ եմ անում վարչապետին, որ դեկտեմբերի 6-ին ՀԱՊԿ-ի նիստին մասնակցի ոչ թե ինքը, այլ Հանրապետության նախագահը ». Դավիթ Շահնազարյան

«Արտաքին քաղաքականությունը ոչ թե նրա համար է, որ նորանոր հակառակորդներ ու թշնամիներ ձեռք բերես, այլ որպեսզի կարողանաս թշնամուն դարձնել հակառակորդ, հակառակորդին` չեզոք, չեզոքին` համակիր, համակիրին` բարեկամ, իսկ բարեկամին էլ դաձնել դաշնակից: Իշխող վարչախմբի համամասանական ցուցակի հինգերորդ տասնյակում ընդգրկված է մի մարդ, ով այդ թիմում բոլորից լավ է տիրապետում արտաքին քաղաքական ու տնտեսական հարցերին, և ես կխնդրեի, որ նա այս պարզ իրողությունը բացատրեր վարչապետի պաշտոնակատարին: ՀԱՊԿ-ի վերջին հանդիպմանը, Հայաստանը, ըստ էության, խախտել է կոնսենսուսը:

Արտաքին հարաբերություններում կոնսենսուս խախտելը կատարյալ թուլության նշան է, որովհետև դա նշանակում է` փաստարկ չունես, իրավունք ես կիրառում: Այն, որ Հայաստանը ՀԱՊԿ-ում չի պահպանելու գլխավոր քարտուղարի պաշտոնը, օգոստոսից գիտեին բոլորը, այդ թվում` ներկայիս իշխանությունները, և ակնհայտ է, որ դեկտեմբերի 6-ին դա նույնպես չի լինելու, բայց հիմա իրավիճակը շատ է սրվել»,- «Արարատ» Հ/Ը եթերում հայտարարեց ՀՀԿ համամասնական ցուցակի երրորդ համար Դավիթ Շահնազարյանը:

Ըստ նրա` Ղազախստանի ու Բելառուսի նախագահներից Նիկոլ Փաշինյանի` պատասխան պահանջելու վերաբերյալ արված հայտարարությունները ոչ մի կապ չունեն դիվանագիտության հետ, և սխալ է հեղափոխականությունը բերել Կառավարություն և առավել ևս` արտաքին հարաբերությունների ոլորտ:

«Միաժամանակ ասվում է, որ այս հարցում Ռուսաստանը կառուցողական դիրք է պահպանում, բայց պետք է հիշել, որ ՀԱՊԿ-ը երկրների խումբ է, որոնք Ռուսաստանի հետ ունեն հատուկ հարաբերություններ, և մեղադրել այդ երկու երկրներին ու ասել, որ Ռուսաստանը կառուցողական դիրքորոշում ունի, չի կարելի: Մենք պետք է հասկանանք, որ դեկտեմբերի 6-ին այդ մթնոլորտում հարաբերությունները կարող են վերջնականապես խզվել: Այս իրավիճակում ես կոչ եմ անում վարչապետին, որ դեկտեմբերի 6-ին ՀԱՊԿ-ի նիստին մասնակցի ոչ թե ինքը, այլ Հանրապետության նախագահը, որովհետև Արմեն Սարգսյանն ունի հսկայական փորձ, դիվանագիտական հարաբերություններ և այդ մթնոլորտը կարող է լիցքաթափել»,-հավելել է Դավիթ Շահնազարյանը:

Վերջինս կարծում է, որ այս հարցը լուծելու համար պետք է օգտագործել նաև այս իշխանափոխության մեջ առանցքային դեր ունեցած ԲՀԿ առաջնորդ Գագիկ Ծառուկյանի հնարավորությունները:

Ըստ Դ. Շահնազարյանի`արտաքին քաղաքականությունը պետք է լինի պրագմատիկ և արդյունավետ: Արդյունավետություն արդեն չկա, բայց լարվածությունը թոթափելու համար պետք է օգտվել իր` արդեն նշած տարբերակներից ՀԱՊԿ-ը վերջնականապես Ադրբեջանին չհանձնելու համար:

Այս մասին գրել է 168.am -ը: