Փաշինյանը ունի՞ կոնկրետ գործողությունների ծրագիր ՀԱՊԿ-ի շուրջ ճգնաժամից դուրս գալու համար (Տեսանյութ)

Երեկվա իր ասուլիսում Փաշինյանը ներկայացրեց այն խնդիրների շուրջ իր տեսակետները, որոնք ակտուալ են և հուզում են հանրությանը:

Առաջին հարցը, որ հուզում էր մեր լրագրողներին, դա ՀԱՊԿ-ում ստեղծված իրավիճակն է և հայ-բելառուսական հարաբերությունների վատթարացումը: Ինչպես է պատկերացնում այս խնդրի լուծումը Փաշինյանը:

Նախ նա նշեց, որ փորձելու է պարզաբանում ստանալ Լուկաշենկոյից՝ Ադրբեջանին զենքի վաճառքի կապակցությամբ:

Դիցուք, Լուկաշենկոն ասելու է, որ այն չի հակասում միջազգային նորմերին: Այդ դեպքում ի՞նչ է անելու Փաշինյանը:

Ի գիտություն նշենք, որ Մինսկի գործելաոճը հասկանալի է: Նա երբեք չի թաքցրել, որ Բաքուն իր համար ավելի արժեքավոր գործընկեր է, քան՝ Երևանը: Նախ Բելառուսի պարտքը Ադրբեջանին կազմում է մոտ 2 մլրդ դոլար, բացի այդ, Մոսկվայի հետ սուր ճգնաժամի ժամանակ հենց Բաքուն նրան օգնության եկավ: Գումարած այս ամենին, Լուկաշենկոն շահագրգռված է, որ այս տարածքում ունենա կայուն գործընկերներ,  Մոսկվային հակակշռելու համար: Իսկ այդ դերում վաղուց հայտնվել են Աստանան և Բաքուն:

Վերջապես, Լուկաշենկոյի ու Նազարբաևի գլխավոր նպատակն է՝ այս կառույցի անդամ դարձնել Ադրբեջանին, նույնիսկ՝ ի հաշիվ Հայաստանի:

Այսքանից հետո, հետաքրքիր է հասկանալ, թե ի՞նչ է ուզում պարզել Փաշինյանը՝ Լուկաշենկոյից:

Փաշինյանը ունի՞ այդ հարաբերությունների հետագա վատթարացման դեպքում սեփական գործելաոճի սցենար: Դիցուք, այս կոնֆլիկտի արդյունքում մնացած կողմերը պաշտպանում են Բելառուսին:

Ո՞րն է լինելու Փաշինյանի քայլը:

Հիմա մոդայիկ է դարձել ցիտել «մեծերին», մենք էլ փորձենք «հնամաշ» չընկալվելու համար հիշել Չերչիլի խոսքերը. «Եթե ուզում էք փչացնել ձեր հարաբերությունները ինչ որ մեկի հետ, սկսեք նրա հետ հարաբերություններ պարզել»,- նշում էր նա: Բայցև ավելացնում էր Չերչիլը՝ եթե այս ամենի վերջնաարդյունքում հաշվել էք, որ շահելու էք:

Բաքվում, վստահ եմ, որ այս սցենարը հաշվել են, իրենց օգուտն էլ տեսանելի է: ՀԱՊԿ-ը միակ հարթակն է, որտեղ նրանք թույլ էին մեզնից և ահա այս ամենից հետո, իրավիճակը փոխեցին՝ մեր իսկ սխալներից օգտվելով: Հիմա Երևանը ունի՞ սցենար այս վիճակից դուրս գալու համար: Ահա այս հարցն է, որ պետք է հուզի մեր հանրությանը, քանզի, դրանից է կախված լինելու Ղարաբաղի, Հայաստանի և սահմաններին կանգնած մեր երեխաների անվտանգությունը:

Արտակ Հակոբյան