Նաղդը թողած՝ ընկել ենք նիսյայի հետևից

#Ամուլսարի հանքի շահագործման հարցն արդեն ամիսներ շարունակ օդում կախված է` ոչ այս կողմ, ոչ այն կողմ: Դեպի հանքավայր տանող ճանապարհները շարունակում են փակ մնալ շահագործման դեմ պայքարողների կողմից, հանքավայրի շահագործման թույլատվություն ստացած ընկերությունն էլ` «#ԼիդիանԱրմենիա» -ն, որը միլիոնավոր դոլարների ներդրում է արել և նույնքան մեծության հարկեր է խոստանում, շարունակում է համբերատար սպասել:

Ինչ դեր ունի այս գործում կառավարութունը ... Վարչապետի պաշտոնակատար Նիկոլ Փաշինյանն երեկ հայտարարել է, որ այս ներդրումային ծրագրի հետ կապված որոշումը ակնկալվում է մինչ գարուն կայացնել: Իհարկե, լավ է, որ խնդրի հանգուցալուծումը կարծես թե մոտենում է, բայց հարկ կհամարենք շեշտել, որ ըստ ծրագրի, հանքն իր աշխատանքները պետք է սկսեր և ահռելի ծավալով հարկերը սկսեր վճարել դեռ այս տարվա նոյեմբեր-դեկտեմբեր ամիսներին:

Ինչևէ... սպասենք զարգացումներին:

Նիկոլ Փաշինյանը հայտարարել է նաև, որ Հայաստանի տնտեսությունը չպետք է հենվի հանքարդյունաբերության վրա և պետք է մտածել այլ ճյուղերի մասին: Հույն ֆիզիկոս Արքիմեդեսն այստեղ կասեր «էվրիկա», իհարկե, բոլորս էլ հասկանում ենք, որ տնտեսությունը չպետք է հենվի միայն հանքարդյունաբերության վրա, բայց ինչու ենք աչքաթող անում այն, ինչ ունենք այս պահին: Եթե այս պահին մենք չունենք նախադրյալներ հզոր մեքենաշինության, նորագույն տեխնոլոգիաներիր զարգացման կամ ասենք ռոբոտաշինության համար, ինչու չենք օգտագործում այն հնարավորությունները, որն այս պահին ունենք: Ի վերջո, աշխարհի զարգացած երկրներում նույնպես հարյուրավոր, եթե ոչ հազարավոր հանքեր կան, և նրանք երբեք չեն կանգնում ասում`մենք չպետք է հենվենք հանքարդյունաբերության վրա, դա մեզ պետք չի:

Ժողովուրդն իմաստուն խոսք ունի` «նաղդը թողած՝ ընկել ենք նիսյայի հետևից»:

Զարգացրեք, բոլոր ճյուղերն էլ զարգացրեք, բայց ձվի մեջ մազ մի փնտրեք:

Արվել է աշխատանք, կատարվել են Հայաստանի համար շատ մեծ ներդրումներ, նույնքան մեծ հարկեր են սպասվում, հազարավոր մարդկանց աշխատանքի հարց է լուծվելու, այս շարքը երկար կարող ենք շարունակել:

Ասում եք պետք է փաստերի վրա հիմնված լինի, դե ուսումնասիրեք բոլոր փաստերը, բոլոր կողմերին, տեսեք արդյոք պատահաբար այլ ականջներ չեն երևում այս ծրագիրը տապալելու ցավով տոգորված կողմերի ու փաստերի արանքում:

Լիկա Սվասյանի ֆեյսբուքյան էջից