«Նիկոլ վարչապետ» vs «Մեր խոսքը գործ է». առաջին երկու կարգախոսները հայտնի են

Իշխանական «Իմ քայլը» դաշինքը նախընտրական քարոզարշավը կիրականացնի «Նիկոլ վարչապետ» կարգախոսով: Այս կարգախոսով 3-րդ ընտրատարածքում ընտրողներին իր անելիքները կներկայացնի ցուցակի 181-րդ թեկնածու, պատգամավոր Հրաչյա Հակոբյանը: Վերջինս վարչապետի պաշտոնակատար Նիկոլ Փաշինյանի տիկնոջ եղբայրն է:

Ցուցակի վերջին եռյակում գտնվելը մտածված է՝ առաջնահերթությունը հարազատներին չի տրվել: Բայց արդյո՞ք Երևանի Շենգավիթ-Մալաթիա-Սեբաստիա վարչական շրջաններն ընդգրկող ընտրատարածքից Նիկոլ Փաշինյանի գլխավորած դաշինքից առաջադրվելը հաղթանակի երաշխիք չէ, - «Ազատության» այս հարցին Հակոբյանը պատասխանեց․ - «Կապել մենակ, որ Նիկոլ Փաշինյանի վարկանիշը բարձր է, և մենակ դրա համար ես պետք է շատ ձայներ հավաքեմ ռեյտինգային կարգով, այդքան էլ արդար չեմ համարում, որովհետև ես աշխատել եմ, ես աշխատում եմ, էնպես որ՝ վստահ եմ, որ ես կունենամ իմ ընտրողներին, ովքեր կընտրեն ինձ իմ արած աշխատանքի համար»:

Իսկ «Բարգավաճ Հայաստան» կուսակցությունն առաջիկա խորհրդարանական ընտրություններին մասնակցելու է «Մեր խոսքը գործ է» կարգախոսով:

Սա, ի դեպ, ԲՀԿ-ի նախորդ՝ 2017 թվականի ընտրությունների կարգախոսն է: Այս տեղեկությունը Factor.am-ին փոխանցեցին ԲՀԿ-ական աղբյուրները:

Միաժամանակ նրանք տեղեկացրին, որ քննարկվում է նաև «Հավատա, վստահիր, պահանջիր» կարգախոսի տարբերակը, բայց սա լինելու է որպես ենթակարգախոս:

Zham.am