Խոշոր բիզնեսի համար Մայրապետյանի ճակատագիրը լինելու է կողմնորոշիչ բոլոր տեսանկյուններից. Տեսանյութ

Ինչպես հայտնի է, անցած ուրբաթ Փաշինյանը աշխատանքային ընտրիքի էր հրավիրել Հայաստանի խոշոր հարկ վճարող ընկերությունների ղեկավարների:

Ինքնին այդպիսի հանդիպումները դրական ազդեցություն կարող են թողնել իշխանություն - բիզնես փոխհարաբերությունների վրա, qանզի շատ հարցեր իշխանության համար կարող են հասկանալի դառնալ հենց ուղիղ շփումների ընթացքում:
Հավելենք, որ երկրի տնտեսության շոգեքարշը հենց խոշոր բիզնեսն է, ինչքան էլ որ նրանց այսօր փնովում են: Եվ եթե նրանց գործերը լավ չլինեն, ապա դա անմիջապես կարող է ազդել նաև երկրի տնտեսության վրա: Ինչքան ուժեղ լինի մեր տնտեսությունը, այնքան մարդկանց կենսամակարդակի բարձրացման հնարավորությունը կմեծանա: Երկրից արտագաղթի տեմպերը կփոքրանան: Ունենալ ուժեղ տնտեսություն, կնշանակի ունենալ նաև ուժեղ բանակ: Իսկ դա իր հերթին կնշանակի ուժեղ դիրք՝ բանակցային գործընթացում: Այն կմեծացնի մեր երկրի անվտանգության գործակիցը և ի վերջո հիմք կստեղծի մեր ազգային իղձերի իրականացման համար:

Ուժեղ երկրներին են Աշխարհում հարգում և նրանց հետ հաշվի նստում:
Այսպիսով, անչափ կարևոր է, որ խոշոր բիզնես - իշխանություն հարաբերությունները փոխվստահության մթնոլորտում լինեն:
Իսկ այդ փոխհարաբերություններում ցանկացած կնճիռ ուղղակի կամ անուղղակի ազդում է այդ փոխհարաբերությունների վրա:

Վերցնենք, օրինակ, Մայրապետյանի գործը:

Երբ գործարարները տեսնում են, թե ինչ է կատարվում իրենց կոլեգայի հետ, ապա ինչքանո՞վ է դա նպաստելու այդ փոխհարաբերությունների ամրապնդմանը:

Երբ մարդուն կալանավորում են անհեթեթ մեղադրանքով, ավելին, նույնիսկ խափանման միջոցը, որպես կալանք չեն ուզում փոխել, պարզ չէ՞, որ այս ամենից հետո, գործարարները տաս անգամ կմտածեն և նոր որոշում կկայացնեն՝ ներդրումներ կատարել:
Երբ մի գործի պատրվակով տանում են ստուգման բոլորովին այլ փաստաթղթեր, այն էլ 15 տարվա կտրվածքով, միթե ակնհայտ չէ, որ դրանից հետո, ոչ մի ճիշտ խոսք չի վստահեցնի գործարարներին, որ Հայաստանում տիրում է վստահելի մթնոլորտ:

Հենց այստեղ է սխալվում ցանկացած տիպի իշխանություն:

Եվ եթե դա դառնում է հիմնական խաղի կանոն, ապա ոչ մի երաշխիք չի լինի, որ վաղն էլ մեկ ուրիշ իշխանություն մեկ այլ գործարարին նույն բանը չի անի:

Ցանկացած իշխանության թվում է, թե ինքը արդար է, և մյուսներն են վատը, թալանչի, խաբեբա:

Վերջնարդյունքում հաջողվում է այն իշխանությունը, որ պատկերավոր ասած, «սպիտակ ոչխարները սևերի հետ չի խառնում»: Այսինքն բիզնեսը քաղաքականության հետ չի խառնում: Միայն այդ դեպքում իշխանությունը ձեռք կբերի իրական վստահություն բիզնեսի մոտ: Արդյունքում երկրում և ներդրումներ կլինեն, և տնտեսական իրական աճ կգրանցվի, և մարդկանց կենսամակարդակը կբարձրանա: Եվ այս ամենը ավելի երկարակյաց կդարձնի նաև այդ իշխանության կյանքը:

Ինչքանով այս ամենը կգիտակցի Փաշինյանը, ցույց կտա մոտ ժամանակը: Համենայդեպս այդ գիտակցումը բխում է և իր, և երկրի շահերից:

Արտակ Հակոբյան