Ճիշտ աշխատանքի դեպքում ՀՀԿ-ն ընտրություններում երկրորդ տեղի ամենամեծ հավակնորդն է. Էդուարդ Շարմազանով

Ամենայն հավանականությամբ կընդունվի որոշում, որ կուսակցությունը մասնակցում է արտահերթ խորհրդարանական ընտրություններին: Այս մասին լրագրողների հետ զրույցում ՀՀԿ խորհրդի նիստից առաջ ասաց ՀՀԿ խոսնակ Էդուարդ Շարմազանովը:

Ինչ վերաբերում է ցուցակը իր, Արմեն Աշոտյանի և Վիգեն Սարգսյանի կողմից գլխավորելու հարցին, Էդուարդ Շարմազանովն ասաց. «Մենք ցուցակի հետ կապված որևէ հարց չենք քննարկել. մի բան կարող եմ ասել, որ ես երբեք ո՛չ մանդատի, ո՛չ ցուցակի համար կռիվ չեմ տվել, համոզված եմ՝ Արմեն Աշոտյանը ևս, մեր պայքարը մանդատի համար չէ, մեր պայքարը գաղափարի, սկզբունքի համար է, մեր պայքարը ցուցակում լավ տեղ ունենալու համար չէ, մենք ամեն մեկս ունենք մեր տեղը, դա Աստված է մեզ տվել, և անկախ նրանից, թե ով որ համարը կլինի, պետք է պայքարել»։

Շարմազանովը նշեց, որ ճիշտ աշխատանքի դեպքում Հանրապետական կուսակցությունը ընտրություններում երկրորդ տեղի ամենամեծ հավակնորդն է:

Tert.am-ի հարցին, թե խնդիր չի համարում, որ շատ ձայն բերող պատգամավորները այս ընտրություններին չեն մասնակցելու, Էդուարդ Շարմազանովն ասաց. «Նախ մենք բոլորին հաջողություն ենք մաղթում, բացի դրանից, ՀՀԿ-ն այսօր ունի այլ խնդիր, իսկ 2017 թվականին այլ խնդիր ուներ: 2017 թվականին մենք գնում էինք 50-60 տոկոս հավաքելու, բացարձակ մեծամասնություն դառնալու, այսօր մենք գնում ենք դառնալու խորհրդարանում միակ և ամենահիմնական ընդդիմադիր ուժը, գնում ենք՝ երկրորդ ուժը լինելու ակնկալիքով, և պետք է գնանք ազգային քրիստոնեական ընդդիմադիր կեցվածքով ու կոչ անենք հանրությանը՝ ընտրեն իսկական ընդդիմադիր կուսակցությանը»,- ասաց նա և նշեց, որ բոլորը պետք է ռեյտինգային ընտրակարգով առաջադրվեն, առավել ևս նրանք, ովքեր առաջին տասնյակում են լինելու: