Բաբլոյանը հեռանում է քաղաքականությունից (Տեսանյութ)

Այսօր լրագրողների հարցերին պատասխանելիս, ԱԺ նախագահ Արա Բաբլոյանը հայտարարեց, որ պատրաստվում է հեռանալ քաղաքականությունից, պատճառաբանելով, որ արդեն մեծահասակ է և ժամանակն է, որ քաղաքական թատերաբեմ գան նոր, ավելի երիտասարդ գործիչներ:

Այսպիսով կարող ենք արձանագրել, որ ՀՀԿ-ն պատրաստվում է փոխել իր կազմն ընտրությունների շեմին և շատ հավանական է, որ այս կուսակցության նախնտրական ցուցակում ՀՀԿ-ի ծերակույտը այլևս իր ներկայացուցչությունը չի ունենա:

Փաստորեն, միայն իշխանությունը կորցնելուց հետո ՀՀԿ-ում հասկացան, որ հին գործիչներից պետք է ազատվել: Ավելին, նաև այդ հին գործիչների պատճառով է, որ ՀՀԿ-ն կորցրեց իր իշխանությունը:
Այդպիսին է դառնում ցանկացած իշխանություն, ով ձեռք է բերում բացարձակ մենաշնորհ և կորցնում է իր ադեկվատ պատկերացումները երկրի հեռանկարի վերաբերյալ:

Բաբլոյանի այսօրվա՝ իր քաղաքականությունից հեռանալու անոնսը դրա վկայությունն է: Հետաքրքիր է, որ այս խոստովանությամբ հանդես եկավ այս կուսակցության համեմատաբար համեստ գործիչներից մեկը, ինչը ևս մեկ անգամ ցույց է տալիս, որ Հայաստանում քաղաքական ուժերի ներկայացուցիչները խոհեմ են դառնում, երբ կորցնում են իշխանությունը:

Կկարողանա փոխել այս վատ ավանդույթը Փաշինյանի իշխանությունը՝ չկրկնելով նախորդների սխալները, ցույց կտա ժամանակը:

Արտակ Հակոբյան